Maharjan Ratna

मथुरा सायमि” इन्कलाब जिन्दाबाद धका हाला जुइमते ।” माम्हं जितः तःक्वः न्वाये धुंकल। व धागु छु जिं मस्यू । जिं मथू । न्यना ” धालकि छु जुइ माॅ ?” वं धाल,”धायेमते धालकि सुंक च्वॅ रे । अथे धयाजूपिन्त मखंला पुलिसं ज्वनायंकूगु। छन्त नं ज्वना यंकी। कोरां कि कोरां दाइ। पुलिस खना मग्याला छ ? ” मांया खॅ न्यना धात्थें जि ग्यात । पुलिस खनकि हे थारा न्हुइगु जुल । मांया बिरूध्दय् जिं तिरिक्क नवाये मफुत । ख्यागुलिं ग्यागु । उकिं हालाहिला मजुया । नुगलय् चितासू मलू । मनय् खॅ ल्हानाच्वनी

  मरुइ महाद्यः पार्बती छेय् ल्यूनेसं जिमिगु स्कूल । छेली गुरूबाःपिनिगु अफिस । अन हे लिक्कसं नसात्वॅसाया पसः । आलु कवाफ , चाना , चतांमरि अले वः छुइगु नं याः अन । हाफ टाइम जुलकि पसलय् न्ह्याबलें मनूत मो मो । फ्यतुइत थाय् दइमखु । आलु कवाफ गुलिसिनं लपतय् प्वःचिना यनी । गुलिसिनं अन हे दनाः सिंकां तियाः नइ । लप्ते थाःगु ति नं फ्यत्तुफ्यइ । चाना निगःचा द्यःने तया चतांमरि छपाया धिब्छगः । धिबा छगः। धिम्निगःवंगु चतांमरी चाना व आलु भचा नं तया छुनाबी । प्वाः हे जाः ।

मचाबले तसकं अस्यः । खुइगु , हेकेगु , ध्वं लायेगु । शान्ति निकुञ्ज बिद्यालय ब्वनेगु स्कूल । प्याफः । बाज्याया कायपिं निम्ह नं दु ।अन हे स्कूलय् ब्वनीपिं । नापं वनेगु , नापं लिहाॅ वयेगु। स्वम्हं झंगःत । स्कूल वने धका वनेगु । मवंसे न्ह्यान्ह्याथाय् चाचाहिलाः स्कूलं त्वःतीगु इलय् खःथेमिंक तुप्लुक्क छे थ्यंकः वयेगु । ब्वनेगु कां , मनू ध्वां । छन्हु । न्हापालिपा थे सफू पॅ ज्वना स्वम्हं स्कूल वने धका वना। न्हिच्छि जारांतारां उखेथुखे चाचाहिला । पायछि ई स्वया छे थ्यंकः वया । ” नये पित्यात ज्वी, का”