लुॅयाम्ह कतांमरि ( छपु चिबाखं).

…स्याक्क न्ह्यः वयेकाच्वंम्ह भाःतयात रसिलां म्ह गिलिगिलि यानाः थन । मदं । अले नेतालय् पारापारां दाल । रबिया न्ह्यलंचाल । जुरूमुरूं दन । भुखाय् जकं ब्वःगुला । छुं जकं जूगुला । वं छुं मसिल ।
” न्ह्यो हे स्यंक । छाय् थनागु दः ? ” धाधां व ग्व हे तुला छ्वत ।
रसिलां भाःतयात झातापाता यानाः फेतुका धाल, “जि म्हगसय् म्हंगु धया म्हगसय् । न्यनादिसॅ । गजबगु हगस । पत्याः हे जुइ थाकुगु अचम्मगु म्हगस । न्यना ला दिसॅ । ”

” कॅ सा याकन ” मयः मयः रबिं नवात ।
” पुजा क्वथाय् जि । फुक्क द्यःपिन्त पुज्याना च्वनागु । अचम्म छु जूगु स्यूला छिं ?”
“आः , छं मधायेकं गय् सी जिं ,” रबिया म्हुतुं सः पिज्वल ।
” पत्याः हे मजू जि ला । साक्षात भगबान हे प्रकट जुया बिज्यागु । जिं दण्डवत प्रणाम याना । प्रभुया पालि भपुया ।

प्रभुं धया बिज्यात , ” नानी , छंगु सेवा दः तसकं यल । जि लयताया । छंत यःगु छता बरदान फ्वॅ ।”

छु फ्वने , छु फ्वने । थःत माःगु ला सच्छिता हे दु । छता छु फ्वने । जिं बुरायाके न्यनाः कन्हे लिसः बी प्रभु ,” धया । वसपोल मानय् जुया बिज्यात ।

” छु फ्वनेगु जुल ले सा अयसा छं ? ”

जिं निर्णय याये धुन । लुॅ । लुॅ थपायचो थिकेजुजुं थाहाॅ वनाच्वन । तोलां हे गुलि गुलि थ्यन धाल । जिं ला द गोल्डेन टचया बाखनय् जुजु मिदासं थें थम्हं थ्यूथ्यूगु सकतां लुॅ जुइमा प्रभु धकाः हे फ्वने । अले थ्यूथ्यूगु सकतां लुॅग्वारा जुइ । देश हे लुॅयागु जुइ । न्ह्यागु थजु रे मेगु । ज्यू कि मज्यू ? ”

रबि पलख घुरय् जुल । अले धयाहल, ” मज्यू । मज्यू । बिल्कुल हे मज्यू । ”
” छाय् ? छाय् मज्यूगु अपायचो ? ”
” मज्यू धासेंलि मज्यू का । मयो दः । सकलें लुॅ । सकतां लुॅ । छ नं लुॅयाम्ह कतांमरिचा जुलकि जिं छु याना च्वनेगु? आलिङ्गन यायेगु स्वैत ? ” स्पर्श हे मन्त कि जीवन हे मन्त । जीवन मदुगु जीवन मयो दः । मयो । लुॅयाम्ह मखु , जितः ला- हियाम्ह मनू माः । ला- हियाम्ह …….। ”
उखे रसिलाया मिखां ख्वबिया हिति हाल !!!