वरिष्ठ खोज पत्रकार मीरा राजभण्डारी अमात्यको अमेरिकामा निधन

काठमाडौँ/खोज पत्रकारितामा एक विशेष पहिचान बनाउनुभएकी वरिष्ठ पत्रकार मीरा राजभण्डारी अमात्यको अमेरिकास्थित प्रसिद्ध ‘मेयो क्लिनिक’मा उपचारका क्रममा निधन भएको छ। उहाँका छोराले सामाजिक सञ्जालमा एक भावुक शोक पोस्ट शेयर गर्दै आमाको निधनको दुःखद खबर सार्वजनिक गर्नुभएको हो।

नेपाल पत्रकार महासंघ काठमाडौँ जिल्ला शाखाकी पूर्व सदस्य तथा आदिवासी जनजाति पत्रकार महासंघ (फोनिज) काठमाडौँकी पूर्व अध्यक्ष समेत रहनुभएकी अमात्यको खोजमूलक लेख ‘विस्थापनको सङ्घारमा ग्वल देय्‌’ निकै चर्चित मानिन्छ। पशुपति क्षेत्रको विस्तारका क्रममा त्यहाँबाट हटाइएका र हटाउन खोजिएका प्राचीन बस्तीको विषयमा उहाँले गर्नुभएको गहिरो खोजमूलक आलेखका आधारमा एसएम इन्फोटेनमेन्ट प्रा.लि. (SM Infotainment Pvt. Ltd.) ले वृत्तचित्र (Documentary) निर्माण गर्ने सहमति भई मिलेर कार्य अघि बढाएको थियो। उक्त सहमति अनुसार वृत्तचित्र निर्माणको पहिलो चरणको काम समेत सम्पन्न भइसकेको थियो।

लामो समयदेखि चौथो चरणको (Stage 4) स्तन क्यान्सरसँग जुधिरहनुभएकी अमात्य हसिलो स्वभाव, निडर व्यक्तित्व र ऊर्जावान् पहिचानका कारण गम्भीर रोगसँग लडिरहेको आभाससम्म दिन्ननुहुन्थ्यो। उहाँको तिखो कलम र निर्भीक खोज पत्रकारिता नेपाली सञ्चार क्षेत्रमा निकै लोकप्रिय थियो।

सामाजिक सञ्जालमा छोराले दिएको जानकारी अनुसार गत डिसेम्बरको सुरुतिर अमेरिकाको मिनेसोटामा घरमै कुर्सीबाट पछाडि लडेर टाउकोमा चोट लागेपछि उहाँलाई स्थानीय ‘मेयो क्लिनिक’को आकस्मिक कक्ष (Emergency Room) मा भर्ना गरिएको थियो। अस्पतालमा कुराकानी भइरहेकै क्रममा उहाँ अचानक अचेत हुनुभएको थियो।

अस्पताल भर्ना भएपछि चिकित्सकहरूले २४ घण्टाभित्रै उहाँको टाउकोको तीन पटकसम्म जटिल शल्यक्रिया (Craniotomies) गरेका थिए। शल्यक्रियापछि करिब एक महिनासम्म कोमामा रहनुभएकी उहाँको अन्ततः शरीरभरि फैलिएको क्यान्सरको जटिलता र दुर्घटनाका कारण देहान्त भएको हो।

दिवंगत पत्रकार अमात्यको अन्तिम संस्कार पुरोहित बासव राजोपाध्यायको सहयोगमा धार्मिक परम्परा अनुसार सम्पन्न भइसकेको छ। उहाँको असामयिक निधनले नेपाली पत्रकारिता जगत, विशेष गरी खोज तथा संस्कृति/जनजाति पत्रकारिताको क्षेत्रमा अपूरणीय क्षति पुगेको छ।