त्रिशूली बजार र ढुङ्गे बजार क्षेत्रमा बाढीका कारण ८५ जनाको ज्यान गएको पुष्टि, ४८३ परिवारलाई सुरक्षित स्थानमा व्यवस्थापन

नुवाकोट / गत भदौ १० गते लिन्दे खोलाको बाँध फुटेर भोटेकोशी हुँदै त्रिशूली नदीमा मिसिएको भीषण बाढीका कारण विदुर नगरपालिका वडा नं. १ अन्तर्गत त्रिशूली बजार र ढुङ्गे बजार क्षेत्रमा भएको मानवीय तथा भौतिक क्षतिको विवरण सार्वजनिक गरिएको छ।

विदुर नगरपालिका वडा नं. १ कार्यालयले सार्वजनिक गरेको सूचनाअनुसार उक्त विनाशकारी बाढीबाट वडाका ८५ जना नागरिकको मृत्यु भएको छ। बाढीले घर, व्यवसाय तथा विभिन्न भौतिक संरचनामा अकल्पनीय र अपूरणीय क्षति पुर्‍याउनुका साथै स्थानीय समुदायको जनजीवन अस्तव्यस्त बनेको छ।

वडा कार्यालयका अनुसार बाढीबाट प्रभावित ४८३ घरधुरीका परिवारलाई सुरक्षित व्यवस्थापन गर्न विदुर नगरपालिका वडा नं. ८ स्थित भैरम माध्यमिक विद्यालय तथा इन्द्रेणी आधारभूत विद्यालय (बाद्रे नर्सरी) मा होल्डिङ सेन्टर स्थापना गरिएको छ।

बाढीपीडितलाई तीन वर्गमा विभाजन

राहत तथा पुनर्स्थापना कार्यलाई व्यवस्थित र प्रभावकारी बनाउन प्रभावित परिवारलाई तीन प्रकारका कार्डमार्फत वर्गीकरण गरिएको वडा कार्यालयले जनाएको छ।

• रातो कार्ड – पूर्ण वा आंशिक रूपमा घर क्षति भई बस्न अयोग्य भएका परिवार।
• निलो कार्ड – व्यवसाय सञ्चालन गरिरहेका तर बाढीबाट प्रभावित भएका व्यवसायी।
• पहेँलो कार्ड – कोठा भाडामा लिएर जीविकोपार्जन गर्दै आएका प्रभावित परिवार।
• 

वडा कार्यालयले हाल राहत वितरण कार्य निरन्तर सञ्चालन भइरहेको जनाएको छ। विशेषगरी रातो कार्ड प्राप्त परिवारलाई विदुर नगरपालिकाको तर्फबाट कोठा भाडा वापत प्रतिपरिवार १० हजार रुपैयाँ उपलब्ध गराइने भएको छ।

त्यसका अतिरिक्त प्रभावित परिवारलाई आगामी छ महिनासम्म आवश्यक पर्ने आधारभूत घरायसी तथा राहत सामग्री उपलब्ध गराउने व्यवस्था समेत गरिएको जनाइएको छ।

बाढीका बेला जनधनको क्षति न्यूनीकरण गर्न जनप्रतिनिधि, सुरक्षाकर्मी, सम्बन्धित निकाय तथा स्थानीयवासीले हरसम्भव प्रयास गरे पनि ठूलो मानवीय क्षति भएको वडा कार्यालयले जनाएको छ।

विपद्मा ज्यान गुमाउने सम्पूर्णप्रति हार्दिक श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना प्रकट गरिएको छ।

वडा नं. १ का अध्यक्ष लेनिन रञ्जितले विपद्को कठिन परिस्थितिमा धैर्य, एकता र आपसी सहयोगका साथ अगाडि बढ्न सम्पूर्ण वडावासीमा आग्रह गरेका छन्। स्थानीय सरकार राहत, उद्धार तथा पुनर्स्थापनाको कार्यमा निरन्तर प्रभावित नागरिकको साथमा रहने प्रतिबद्धता समेत व्यक्त गरिएको छ।

त्रिशूली बाढीमा त्रिशूली बजार र ढुङ्गे बजार क्षेत्रमा बाढीका ज्यान गुमाएकाहरूको नामावली