रास्वपा काठमाडौंको संगठन सुदृढीकरण कार्यक्रम सम्पन्न

काठमाडौं /राष्ट्रिय स्वतन्त्र पार्टी (रास्वपा) काठमाडौं जिल्ला समितिको आयोजनामा संगठन सुदृढीकरण तथा आगामी कार्यदिशासम्बन्धी बृहत् कार्यक्रम सम्पन्न भएको छ। संगठनलाई थप सबल, व्यवस्थित र गतिशील बनाउने उद्देश्यका साथ आयोजित उक्त कार्यक्रममा काठमाडौं जिल्लाभरका नेता तथा कार्यकर्ताहरूको उल्लेखनीय सहभागिता रहेको थियो।

कार्यक्रममा काठमाडौं जिल्लाअन्तर्गतका ११ वटा नगर, १० वटा निर्वाचन क्षेत्र तथा १३८ वटा वडा समितिका सम्पूर्ण वडा सभापतिहरूको उपस्थिति रहेको थियो। कार्यक्रममा संगठन विस्तार, व्यवस्थापन तथा आगामी रणनीतिका विषयमा विस्तृत छलफल गरिएको थियो।

कार्यक्रमको सञ्चालन काठमाडौं जिल्ला सचिव शन्तमान महर्जनले गरेका थिए भने प्रमुख अतिथिका रूपमा उपस्थित काठमाडौं जिल्ला सभापति राजा शाक्यले विशेष प्रस्तुति तथा कार्यक्रमको सहजीकरण गरेका थिए। काठमाडौं जिल्लाभर नयाँ संगठन विस्तार तथा व्यवस्थापनको अभियानमा सक्रिय रूपमा जुटिरहेका सभापति शाक्यले संगठनलाई बलियो, अनुशासित र जनमुखी बनाउने विषयमा विशेष जोड दिएका थिए।

त्यसैगरी नागार्जुन नगर सभापति तथा मोटिभेशनल स्पिकर राजन कोइरालाले संगठन निर्माण, नेतृत्व विकास र आगामी कार्यदिशाबारे प्रेरणादायी प्रस्तुति दिएका थिए।

वक्ताहरूले पार्टीको नीति, सिद्धान्त तथा कार्यदिशालाई जनस्तरसम्म प्रभावकारी रूपमा पुर्‍याउन एकताबद्ध र सक्षम संगठनको आवश्यकता रहेको औँल्याउँदै आगामी दिनमा संगठन विस्तार तथा सुदृढीकरण अभियानलाई अझ तीव्रता दिने प्रतिबद्धता व्यक्त गरेका छन्।

कार्यक्रमले काठमाडौं जिल्लाभर पार्टी संगठनलाई थप सशक्त, व्यवस्थित र परिणाममुखी बनाउने दिशामा महत्वपूर्ण योगदान पुर्‍याउने विश्वास सहभागीहरूले व्यक्त गरेका छन्।