३० वर्षपछि ‘मुनासः’ले फेरि आयोजना गर्‍यो ‘ख्यालः कासा’

‘मुनासः ख्यालः कासा’मा उमेश स्थापित सर्वोत्कृष्ट हास्य-अभिनेता

काठमाडौं । नेवा: कला, संस्कृति तथा हास्य–व्यङ्ग्य क्षेत्रमा लामो इतिहास बोकेको संस्था ‘मुनासः’ले करिब ३० वर्षपछि पुनः ‘ख्यालः कासा’ अर्थात् हास्य–व्यङ्ग्य प्रतियोगिता आयोजना गरेको छ।

कुनै समय ‘हास्य सम्राट’ मदनकृष्ण श्रेष्ठसमेत अध्यक्ष रहिसकेको मुनासःले लामो अन्तरालपछि आयोजना गरेको यस प्रतियोगिताले नेवा: भाषाको हास्य–व्यङ्ग्य तथा सांस्कृतिक प्रस्तुतिलाई पुनः मञ्चमा ल्याएको हो।

प्रतियोगितामा न्हाप (प्रथम), ल्यू (द्वितीय), लियांल्यू (तृतीय) र ह:पा: (सान्त्वना) गरी उत्कृष्ट प्रस्तुतिहरूलाई सम्मान गरिएको छ।

नेपाल भाषा तथा नेवा: कला–संस्कृतिसँग सम्बन्धित ‘मुनासः ख्यालः कासा’ अन्तर्गत  यस वर्ष ‘बांलाम्ह ख्यालिम्व:’ (Best Actor) को उपाधि उमेश स्थापितले प्राप्त गरेका छन्।

प्रतियोगितामा ‘कय्ता तंम्ह नेवा:’ ले न्हाप अर्थात् प्रथम स्थान हासिल गरेको छ। यसको प्रस्तुति नेपाल भाषा सिनेमा विकास केन्द्र, लेखक गणेशराम लाछी तथा निर्देशक आर्यम नक:मि रहेका छन्।

त्यसैगरी ‘थ्व छु जूगु?’ ले ल्यू अर्थात् दोस्रो स्थान प्राप्त गरेको छ। उक्त ख्याल:को प्रस्तुति ख्वप सांस्कृतिक खल: रहेको छ।

‘इमर्जेन्सी श्राद्ध’ ले लियांल्यू अर्थात् तेस्रो स्थान हासिल गरेको छ। यसको प्रस्तुति थेच्व सांस्कृतिक मंका खल: रहेको छ।

त्यस्तै ‘छन्त नं थथे याए य:ला’ ले ह:पा: अर्थात् सान्त्वना स्थान प्राप्त गरेको छ। यसको निर्देशक सारा वज्र तथा प्रस्तुति प्रथमाञ्जली नास: खल: रहेको छ।