प्रधानमन्त्रीलाई मुस्कानको पत्र -‘एसिड आक्रमणकारीलाई फाँसी दिइयोस !’

काठमाण्डौँ । एसिड आक्रमणमा परेकी मुस्कान खातुन अन्सारीले प्रधानमन्त्रीसँग आक्रमणकारीलाई फाँसी दिन माग गरेकी छिन् । खातुनले प्रधानमन्त्रिको नाममा चिठि लेख्दै आफु दुई तिहाई सरकारको ठाउँमा भइदिएको भए तेजाब हान्ने अपराधीलाई फाँसी दिने बताएकी छिन् ।
मुस्कानले यसअघि सीमा बस्नेत र संगीता खड्का लाई एसिड आक्रमण गर्नेलाई कडाभन्दा कडा कानुन भइदिएको भए आफुलाई एसिड आक्रमण गर्ने डराउने जिकिर गरेकी छिन् ।
‘पहिले सीमा बस्नेत र संगीता खड्कालाई एसिड आक्रमण भएको बेला कडाभन्दा कडा कानुन भइदिएको भए आज म यो अस्पतालको बेडमा हुने थिइन होला’ उनले अगाडि भनिन् ‘प्रधानमन्त्रीज्यू हजुरको दुई तिहाई सरकारको ठाउँमा म भइदिएको भए तेजाब हान्ने अपराधीलाई फाँसी दिन्थे होला ।’
मुस्कानले एसिड आक्रमणकारीलाई ठुलो भन्दा ठुलो सजाएको माग गरेकी छिन ताकि अरु बलिका वा चेलीबेटी कसैमाथि पनि तेजाव आक्रमण गर्ने हिम्मत गर्न कसैले पनि नसकुन ।
उनले अगाडि भनिन ‘मैले जति पीडा खपेको छु, त्यो पीडा अरु कोही माथि पनि नहोस् । यो पीडा भनेको सानो पीडा होइन । एउटा देशको ठूलो पीडा हो । आमा र बुवाको पनि पीडा धेरै ठुलो पीडा हो । यो पीडा कसैको आमा र बुवाले खप्नु नपरोस् ।’
यस्तो छ मुस्कानले प्रधानमन्त्रिलाई लेखेको पत्र :
मिति :२०७६/७/५
माननीय प्रधानमन्त्रीज्यू
म मुस्कान खातुन अन्सारी
मेरो तर्फबाट नमस्ते । म एउटा तेजाब आक्रमणको नानी । हजुरलाई एउटा सानो चिठी । यो घटना मसँग घट्यो । यो घटनाको पीडा भनेको ठुलो पीडा हो । पहिले सीमा बस्नेत र संगीता खड्कालाई एसिड आक्रमण भएको बेला कडाभन्दा कडा कानुन भइदिएको भए आज म यो अस्पतालको बेडमा हुने थिइन होला । प्रधानमन्त्रीज्यू हजुरको दुई तिहाई सरकारको ठाउँमा म भइदिएको भए तेजाब हान्ने अपराधीलाई फाँसी दिन्थे होला ।
यसपाली एसिड आक्रमणकारीले ठुलो भन्दा ठुलो सजाए पाओस् ता कि म जस्तो एउटा बलिकामाथि या चेलीबेटी कसैमाथि तेजाव आक्रमण नहोस् । मैले जति पीडा खपेको छु, त्यो पीडा अरु कोही माथि पनि नहोस् । यो पीडा भनेको सानो पीडा होइन । एउटा देशको ठूलो पीडा हो । आमा र बुवाको पनि पीडा धेरै ठुलो पीडा हो । यो पीडा कसैको आमा र बुवाले खप्नु नपरोस् । त्यो दोषीलाई यसपालि ठूलो भन्दा ठुलो सजाय होस् । मेरो हजुरसँग बिन्ती र अपेक्षा छ । हजुरसँग मेरो एउटा अनुरोध छ कि मेरो पीडा बुझिदिनु होस्। यो घटना कसैमाथि नहोस् र कोही पनि तेजाब आक्रमण भएको चेलीबेटी अस्पताल नआओस् भन्ने अनुरोध छ ।
गत भदौ २० गते १४ वर्षीया मुस्कान खातुनमाथि आफ्नै घरनजिकै दुई युवाले तेजाव हानेका थिए। तेजावले डढेर उनको अनुहार, हात र छातीमा गहिरो चोट लागेको छ। अनुहारको एउटा पाटो पूरै डढेको छ। मुस्कान हाल उपचारका लागी कीर्तिपुरस्थित अस्पतालमा छिन्।
उनलाई भेट्न नेपथ्य ब्याण्डका अमृत गुरुङ, गायक राजु लामा, क्रिकेटर पारस खड्का, सोमपाल कामी, पूर्वमिस नेपाल शृंखला खतिवडा, नायक राजेश हमाल मुस्कानलाई भेट्न अस्पताल पुगिसकेका छन्। यस्तै, बलिउड कलाकारहरू अभिनेता सारूखान, अमिताभ बच्चन, वरूण धवन, कृति सेनन लगायतले मुस्कानको स्वास्थ्य लाभको कामना गरेका छन्।
एसिड आक्रमण गर्ने माजिद मियाँ र सम्साद मियाँलाई पक्राउ गरी ज्यान मार्ने नियत तथा तेजाबलगायत अन्य रासायनिक, जैविक वा विषालु पदार्थ प्रयोग गरी कुरूप पारेको मुद्दा दर्ता गरीएको थियो । अदालतका अभियोग पक्षले माजिदलाई १० वर्ष कैद र १ लाख जरिवाना तथा सम्सादलाई ५ देखि ८ वर्ष कैद र १ लाखदेखि ५ लाखसम्म जरिवाना मागदाबीसहित मुद्दा दर्ता गरेको भए पनि जिल्ला अदालतले दुवै नाबालिग रहेको भन्दै सुधार गृहमा पठाइएको छ ।