६० औं विराट नेपालभाषा साहित्य सम्मेलन सम्पन्न

— स्थानीय विद्यालयमा नेपालभाषा विषयलाई पाठ्यक्रममा समावेश गर्नुका साथै सांस्कृतिक सम्पदा संरक्षण जस्ता उल्लेखनीय कार्यको लागिकाठमाडौं महानगर पालिकाका मेयर विद्या सुन्दर शाक्य सम्मानित —नेपाल भाषाको स्नातकोत्तर तहमा उत्कृष्ठ अंक ल्याउने प्रजित शाक्य सम्मानित
भक्तपुर / नेपाल भाषाकै पुरानो संस्था विराट नेपालभाषा साहित्य सम्मेलन गुथिले ६० औं विराट नेपालभाषा साहित्य सम्मेलन भक्तपुरमा आयोजना गरेको छ । साहित्यकार प्रतिसरा सायमिको प्रमुख आतिथ्यमा भएको उक्त सम्मेलनमा काठमाडौं महानगर पालिकाका मेयर विद्या सुन्दर शाक्या विशेष अतिथिका रूपमा आएका थिए । स्थानीय विद्यालयमा नेपालभाषा विषयलाई पाठ्यक्रममा समावेश गर्नुका साथै सांस्कृतिक सम्पदा संरक्षण जस्ता उल्लेखनीय कार्यको लागि विशेष अतिथि मेयर शाक्यलाई सम्मान गरिएको थियो । कार्यक्रममा विभिन्न साहित्यकारहरुद्वारा नेपाल भाषाका साहित्य वाचन गरेका थिए । कार्यक्रममा कवयित्री प्रतिसरा मानन्धर, डा. योगेन्द्र प्रधान, ज्ञानेन्द्रमान बज्राचार्य लगायत करिब १७ जना साहित्यकारहरुले आ–आफ्नो साहित्य प्रस्तुत गरेका थिए । त्यसैगरी गायक जुजुकाजी रंजित , पवित्र कसा: लगायतले गायन प्रस्तुत गरेका थिए । साथै “ह्याउँबाला” पत्रिकाको २९औं अंक तथा बाबुकाजी सुवालको “गांगु सिमा” नामक लघुकथा किताबको विमोचन गरिएको थियो । त्यसैगरी नेपालभाषामा स्नातकोत्तर तहमा उत्कृष्ट अंक प्राप्त गर्न सफल नेपाल भाषा केन्द्रिय बिभाग पाटनका विद्यार्थी प्रजित शाक्यलाई ‘सुरत्न पदक’ र नेपालभाषा बिषय लिई एस इ इ मा उत्कृष्ट अंक प्राप्त गर्ने सदीक्षा महर्जनलाई मध्यपुर थिमि नगरपालिका प्रमुख मदन सुन्दर श्रेष्ठले पदक सहित नगद राशि प्रदान गरेका थिए । विराट नेपाल भाषा साहित्य सम्मेलन नेपाल भाषाकै गौरवपूर्ण इतिहास बोकेको गरिमामय साहित्य सम्मेलन हो । कार्यक्रम विराट गुथिका अध्यक्ष महेन्द्र गोपाल कर्माचार्यको सभापतित्वमा भएको थियो ।