नेपाल भाषा पाठ्यक्रम पिका:गुलिं येंया मेयर उपमेयरयात हन

येँ / नेपाल भासं ब्वनेकुथिइ ब्वनेत पाठ्यक्रम पिका:गु अले ब्वनेकुथी ब्वंकेगु व्यवस्था या:गु ज्याया कदर यासें येंया मेयर विद्या सुन्दर शाक्य व उप- मेयर हरिप्रभा खड्गीयात बसन्तपुलिइ छगू ज्याझ्व: याना हंगु दु ।
थुगु नागरिक अभिनन्दन ज्याझ्व: नेवाः पत्रकार राष्ट्रिय दबू, येँ कचाया ग्वसालय् म्हिगः यें जूगु ख: । “नेपाल भाषाया पाठ्यक्रम पिकायेगु जुइ” धका: मेयरया चुनाव ल्वा:गु इलय् , चुनाव ताकाय् मेयरया उम्मेदवार बियादीम्ह येंया मेयर शाक्यया खँ थन पूवंगु छगू नेवा: भाषा आन्दोलनया नितिं लसताया खँ नं ख: । उकिं थुगु हनायात सकसिनं सकारात्मक रुपं का:गु दु ।
अभिनन्दित व्यक्तित्व मेयर विद्या–सुन्दर शाक्यं येँ मनपां याःगु थ्व ज्यायात नेपाः सरकारपाखें थौं अनुमोदन प्राप्त जूगुलिं सरकारयात सुभाय् देछानादिल । वय्‌कलं येँ मनपां ‘येँ देय् म्हसीके’ सफू ब्वंकाः नेपालभाषा ब्वंकेत्यंगु मखुसें येँ देय्‌या म्हसीका जक ब्वंकेत्यंगु खः धासें येँ देय‌्‌या म्हसीका ब्वंकेगु माध्यम जक नेपालभाषा यानागु खः धकाः स्पष्ट यानादिल ।
अथे हे येँ मनपाया उपमेयर हरि–प्रभा खड्गी श्रेष्ठं येँ देय्‌या म्हसीका धइगु हे नेवाः संस्कृति खः धासें यदि भाषा लोप जुया वन धाःसा कन्हय् वनाः थ्व संस्कृति नं लोप जुया वनीगु जूगुलिं माध्यमया रुपय् भाषायात अनिवार्य यानागु खः धयादिल । मनपाय् निर्वाचित जनप्रतिनिधित वयेधुंकाः सम्पदा ख्यलय् आपालं निर्माणया ज्या न्ह्याःगु खँ नं वय्कलं कनादिल ।
अथे हे नेपालभाषा मंकाः खलःया नायः लिसें जनकवि दुर्गालाल श्रेष्ठं येँ महानगरपालिकां लागू याःगु भाषा सम्बन्धी थ्व व्यवस्था आः देय्‌या मेमेगु नगरपालिकातय्सं नं अनुशरण याना वनेमाःगु बिचाः प्वंकादिल ।
ज्याझ्वः न्ह्यः तिंख्यःध्वाखां मेयर व उपमेयरपिंत पञ्चकन्या, थीथी बाजं, स्कुलया विद्यार्थी, खलः पुचः सहित नगर परिक्रमा याकूगु खः । बसन्तपुली जूगु समारोहय् मेयर, उपमेयर, येँ मनपा लिसें नेपालभाषाया पाठ्यक्रम निर्माण यायेगु ज्याय् ग्वाहालि याःपिंत हनापौ लःल्हाःगु खः । अथे हे ३० गू खलः पुचःतय्सं मेयर व उपमेयरयात हनापौ नं लःल्हाःगु खः ।
अभिनन्दन ज्याझ्व:प्रति सकल नेवा:तय् नुग: क्वसा:गु खनेदुगु ख:सां दबुलिइ दलगत रुपं  नेतात थने ह:गु धका: कुँख्युंगु नं खनेदत । सामाजिक संजालय् नं बांला:गु ज्याया अभिनन्दनयात कया: तस्कं बय् बय् जूूूगु   खनेदत  ।
(बुखं ग्वाहालि : नेपाल भाषा टाइम्स )   किपा : पूर्णिमा  शाक्य