चिला:वंगु ख्युुँ सुपाँय् -चिबाखं

किशोर धुस:

नसंचा ईलय् सकतां नित्यकर्म क्वचायेका जुजु न्हिथंथें झ्यालय् पलख झासु लंनेमाःम्ह ।
झ्यालय् फ्यतुना: उखेथुखे स्वया च्वंबलय् छम्ह भ्वाथःगु वसःपुना तःम्ह फोहरी ख्वाः वःम्ह अन्जानम्ह मनू म्ह लायकुलिइ खनेदयक: वल ।
व मनू खँसांनिसें जुजुया मनं सुख मतायेकल ।
झ्यालं द्वाहाँ वयेत्यंबलय् झ्या फुसय् छ्यं हाना: छ्यनय् बाँमलाक प्वःहे वल । अले तमँ मि जुया: सैनिकयात धाल , “ए ! सैनिक लायकुली वयाच्वंम्ह व मनू यात ज्वनांहिंसा ! तस्कँ अलछिनाम्ह ज्वीमाः वैतः खनेवं जितः बिघ्न जुल , जिं छ्यनय् कष्ट फयमाल !”
सैनिकतयसं व मनूयात ज्वनाहया: हुकुमयात पालन यात ।
जुजुं उम्ह मनूयात न्यन , “छ सु ? गनं वयाम्ह , थन लायकुली छु याःवयाम्ह ? छ अलछिना या ख्वा खनेवं बिछुक जुया जिगु छ्यँ झ्या:फुसय् हाकाः कष्ट फयेमाल । सुथं सुथंनिसें लायकुली वैम्हसित छन्त तुति त्वाल्हायेगु दण्ड बीगु जुल जिं । यदि छं थतः दोषी मुक्त ज्वीगु ईच्छा दुसा धा जिं छन्त छगू ह्वताः बी ,
का छुधायेगु दु का धा !”
उम्ह मनुखं धाल , “महाराज जिं छता खँ न्यने ज्युला ? जितः खनेवं महाराजयात बिछुक जुया छ्यनय् हाकेमाःगुलिं जितः अलछिना धायगु खःसा , जि लायकुली वया महाराज खनेवं जिगु तुति हे त्वाल्हाके मालीगु जुलनि सा , अयसा छु महाराज छःपिं जि स्वयां निदुगँ अल्छिना खतला ?” वया खँ न्यनां जुजु भतिचा त्वलय् जुल ।

वं हाकन धाल “महाराज , जि लजगा चूमलाःम्ह , नये त्वनेत मदुम्ह साहु महाजनतय् नयाःत्वनां अप्वया वानातःगु मुनां नयेगु दैला धका: चाह्यु वयाम्ह खः गथेजुया अलछिना जुइ जि ?”
व धयावन-
“महाराजया दृष्टि धारणा हे पायछि मजूसा उकिया दोषी जि ज्वीला ? सकलें प्रजापिन्त स्वयेगु छपिनिगु दृष्टि धारणा उति मग्यंगु खः उकिं जितः दण्ड बीगु बाँमलाःगु संकल्प याना बिज्यात छःपिसं । जितः तुति त्वाल्हायेगु नितिं सैनिक यात आदेश बिया छाक्क वचन छ्यला:बिज्यात महाराज । थःगु तुति त्वाःल्हाके मायेक बाँमलाःगु जिं छु नं कर्म यानागु मदु । छु ! बाँलाःगु ज्यायाना जीविकोपार्जन याये मफूगुलिं जि अलछिना खःला महाराज ? गजा:म्हसित दोषी , गजाःम्हेसित निर्दोषी खनेगु छ:पिसं चिन्तन मनन् याना चित्त ब्यायाम याये फयेका बिज्याहुँ , ध्यान तया बिज्या:हुँ महाराज !
“छःपिसं न्हापा गबलें निर्दोषी यात दण्ड बियागु दुला: छक लुमंकाः स्मृति तयाबिज्याहुँ ” थुलि धया: व सुम्क च्वन ।
जुजु झसंग वन । सम्यकया फसं जुजुया नुगलय् च्वंगु हाकुगु सुपाँय् बुलुहुं चिलावन ।