दुईजनाको मृत्युपछि कोरोना पुष्टि , आज ५ जना संक्रमितको मृत्यु

काठमाडौं / आज सोमबार  कोरोना भाइरस संक्रमणबाट थप ५ जनाको मृत्यु भएको छ । मृतक दुई जनामा मृत्युपछि संक्रमण पुष्टि भएको हो भने तीन जना संक्रमितको उपचारका क्रममा मृत्यु भएको हो ।
स्वास्थ्य तथा जनसंख्या मन्त्रालयका अनुसार काठमाडौं–१० मध्यबानेश्वरका ७६ वर्षीय पुरुषको मेडिकेयर अस्पतालमा उपचारको क्रममा सोमबार मृत्यु भएको छ ।
कीर्तिपुर २ ट्याङ्लाफाँटका निमोनिया र मधुमेहका विरामीलाई १५ गते अस्पताल भर्ना गरिएको थियो । उनको सोमबार विहान निधन भएको थियो । उपचारका क्रममा मेडिसिटी अस्पतालमा उनको मृत्यु भएको थियो।
यसैगरी वीरगञ्जको कोरोना विशेष अस्पताल, गण्डकमा उपचारका क्रममा आइतबार मृत्यु भएकी वीरगञ्ज–१५ भेडियाहीकी ४५ वर्षीया महिलामा कोरोना संक्रमण पुष्टि भएको छ । शनिबार मृत्यु भएका धनुषाको मिथिला बिहारी नगरपालिका–५ का ४५ वर्षीय पुरुषमा पनि कोरोना संक्रमण पुष्टि भएको छ ।
यसैगरी आज सोमबार ललितपुरको किस्ट अस्पतालमा काभ्रे पाँचखालका ५० वर्षकी एक महिलाको मृत्यु भएको छ । निमोनियाको उपचार गराउन आइतबार दिउँसो १ बजे अस्पताल पुगेकी उनको कोरोना परीक्षण गर्दा संक्रमण पुष्टि भएको अस्पतालका स्रोतले जानकारी दिए ।
यससँगै कोरोना संक्रमणबाट मृत्यु हुनेको संख्या ८१ पुगेको छ ।