नेपालको आठौं संघनायकमा भिक्षु बोधिसेन महास्थविर पदासीन

काठमाडौं / नेपालको आठौं संघनायकमा भिक्षु बोधिसेन महास्थविर पदासीन हुनुभएको छ त्यसैगरी संघउपनायकमा भिक्षु गुणघोष महास्थविर पदासिन हुनुभएको छ ।
सातौं संघनायक ज्ञानपूर्णिक महास्थविरको देहावसानपछि रिक्त रहेको संघनायक पदमा कार्यबाहक संघनायक बोधिसेन महास्थविरलाई आज सोमबार एक कार्यक्रमकाबीच पदासिन गराइएको जानकारी अखिल नेपाल भिक्षु महासंघका महासचिव भिक्षु कौडन्यले दिनुभएको छ ।
उहाँका अनुसार अखिल नेपाल भिक्षु महासंघका उपाध्यक्षहरु भिक्षु सुमेध महास्थविर तथा भिक्षु धर्ममूर्ति महास्थविरको उपस्थितिसहितको अ.ने.भि.महासंघका धर्मानुशासक, पदाधिकारी एवं सम्बद्ध संघसदस्यहरु बीच आज श्रावण १९ गते सोमवार (बु.सं. २५६४, ३ अगष्ट २०२०, ने.सं. ११४० गुंपुन्हि) का दिन काठमाडौं, स्वयम्भूस्थित ऐतिहासिक आनन्दकुटी विहारको सीमागृहमा महासंघका धर्मानुशासक, पूर्व अध्यक्ष, बोधिचर्या विहार (बनेपा) का संस्थापक प्रमुख महासद्धम्मजोतिकधज भिक्षु बोधिसेन महास्थविरलाई संघनायक पतिट्ठापनविधिसहित संघसम्मति विधिपूर्वक नेपालको आठौं संघनायक पदमा धर्मगौरवसहित पदस्थापन गरिएको हो । त्यसैगरी महासंघका धर्मानुशासक, पूर्वाराम विहार , धुलिखेलका संस्थापक प्रमुख महासद्धम्मजोतिकधज भिक्षु गुणघोष महास्थविरलाई विधिपूर्वक संघउपनायक पदमा धर्मगौरवसहित पदस्थापन गरिएको बताउनु भयो ।
संघसदस्य भिक्षुहरुको संघकार्यबीच कम्मवाचाकारक भिक्षु धर्मशोभन महास्थविर तथा भिक्षु शीलभद्र महास्थविरले कम्मवाचा वाचन गर्नुभएको थियो ।
संघउपोसथ कर्मसहित वर्षावासको प्रारम्भलगत्तै संघनायक प्रतिस्थापन सम्पन्न हुँदा काठमाडौं उपत्यकाका उपसम्पदा प्राप्त भिक्षुहरुको उपस्थिति रहेको थियो । महासचिव भिक्षु कौडन्यले अनुकूल समयमा सार्वजनिक समारोहको आयोजना गरी संघनायक अभिनन्दन समारोह गरिने जानकारी पनि दिनुभयो ।