काठमाडौंमा आज ४५ जना थप संक्रमित ,जोखिममा काठमाडौं , रोग नियन्त्रणका लागि आवश्यक कार्य नगरेको भन्दै स्थानीयबासी सरकारप्रति आक्रोसित

काठमाडौं /  आज बिहीबार काठमाडौं उपत्यकामा ४५ जनामा कोरोना संक्रमण देखिएको छ । काठमाडौं जिल्लाका ४१, भक्तपुर र ललितपुरका २/२ जनामा कोरोना संक्रमण देखिएको स्वास्थ्य तथा जनसंख्या मन्त्रालयले जानकारी दिएको छ ।
काठमाडौंका ४१ जना संक्रमितमध्ये राष्ट्रिय जनस्वास्थ्य प्रयोगशाला टेकुमा १९ जना, शुक्रराज ट्रपिकल तथा सरुवा रोग अस्पतालमा १३ जना, शिक्षण अस्पतालमा ४ जना, नेपाल प्रहरी अस्पतालमा ३ जना र स्टार अस्पतालमा २ जनामा संक्रमण देखिएको हो ।
राष्ट्रिय जनस्वास्थ्य प्रयोगशालामा गरिएको परीक्षणमा भक्तपुरका २ जना र स्टार अस्पतालमा गरिएको परीक्षणमा ललितपुरका २ जनामा संक्रमण देखिएको हो ।
नेपालभरि पछिल्लो चौबीस घण्टामा कोरोनाभाइरसका २७४ नयाँ सङ्क्रमितको पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो चौबीस घण्टामा छ हजार ३०४ जनाको स्वाब नमूना सङ्कलन गरी परीक्षण गरिएकोमा २७४ जना नयाँ सङ्क्रमितको पुष्टि भएको हो ।
मन्त्रालयका प्रवक्ता डा. जागेश्वर गौतमले नियमित पत्रकार सम्मेलनमा थपिएका नयाँ सङ्क्रमितसँगै नेपालमा कोभिड-१९ को कुल सङ्क्रमितको संख्या १९ हजार ५४७ पुगेको जानकारी दिए । नेपालमा हाल पाँच हजार २२७ जनामा कोरोनाभाइरसको सङ्क्रमण सक्रिय रहेको मन्त्रालयले जनाएको छ ।
पछिल्लो चौबीस घण्टामा २२७ जना कोरोना सङ्क्रमित निको भएर घर फर्केका छन् । यससँगै नेपालमा कोरोनामुक्त हुनेको संख्या १४ हजार २७८ पुगेको छ । हाल १३ हजार २०१ जना क्वारेन्टिनमा रहेका छन् ।
कोरोनाको इपिसेण्टरको रूपमा काठमाडौं उपत्यका देखिएको छ । तर उपत्यकामा स्थानीय सरकार , प्रदेश सरकार र संघीय सरकारले यसलाई नियन्त्रण गर्न कुनै नयाँ उपाय अपनाएको देखिंदैन ।
उपत्यकाबासी त्रसित छन् साथै सरकारप्रति आक्रासित पनि बनेका छन् । २ जनामा संक्रमण हुँदा कडा लक्डाउन गर्ने तर अहिले जोखिमपूर्ण अवस्था हुँदा पनि लक्डाउन अझ खुल्ला गरेर सरकारले के गर्न खोजेको भनी उनीहरूले प्रश्न गरेका छन् । काठमाडौंमा संक्रमण हुनुको मूल कारण बाहिरबाट मनपरि मानिसलाई उपत्यकामा प्रवेश गर्न दिनुका कारण भएको हो । यसको पूर्ण जिम्मेवार सरकार हो । उनीहरूले आक्रोश पोखेका छन् ।