नियम विपरीत उपत्यका बाहिरबाट मानिसहरू काठमाडौं छिर्दै , कोरोनाको खतरा बढ्ने चेतावनी , चार बस नागढुङ्गाबाट नियन्त्रणमा

काठमाडौं /लकडाउनकै समयमा काठमाडौं उपत्यकामा नियम विपरीत बाहिरी जिल्लाबाट धमाधम मानिसहरू प्रवेश गर्न थालेकोमा काठमाडौंबासी चिन्तित बनेका छन् । काठमाडौं उपत्यका प्रवेश गर्न हिंड्ने ठाउँबाट स्वीकृति लिनुपर्ने र उपत्यकाकाको सम्बन्धित नगर पालिकाले पास दिएपछि मात्र प्रवेश गर्न पाउने आदेश गृह मन्त्रालयले जारी गरेको अवस्थामा यसरी बिना पास दुबैतर्फ सूचना सम्म नदिइ उपत्यका प्रवेश गर्नेहरूको भीड बढेको देखिएको छ । यसैबीच बढी भाडा लिएर बिना पास उपत्यकामा भित्रिने क्रममा रहेका गाडीहरू प्रहरीले नियन्त्रणमा लिएको खबर आएको छ । बढी भाडा लिई नेपालगन्ज र झापाबाट काठमाडौं आएका चार वटा बसलाई प्रहरीले नियन्त्रणमा लिएको बताइएको छ।
ट्राफिक प्रहरी र जनपथ प्रहरीको संयुक्त टोलीले विभिन्न मितिमा बढी भाडा असुल गरी काठमाडौं यात्रु ल्याउने चार वटा सार्वजनिक बसलाई नागढुङ्गाबाट नियन्त्रणमा लिएको हो।
नेपालगञ्जबाट आएका बा ४ ख ७३६३, ना ७ ख ५३९५ नम्बरको बस, बा ४ ख ४५८० नम्बरको हायस तथा झापाबाट आएको ना ५ ख ५८३४ नम्बरको बसलाई ट्राफिक प्रहरीले नियन्त्रणमा लिएको बताएइको छ।
महानगरीय ट्राफिक प्रहरी महाशाखाका एसपी बामदेव गौतमले बस चालकहरु विकाश शर्मा, राहुल डगर, राकेश शाक्य र रूद्र बहादुर घर्तीलाई पनि नियन्त्रणमा लिएको जानकारी दिए ।
उपत्यकामा यसरी बिनापास गाडीमा मानिस ल्याइने क्रम बढेको प्रहरीले स्वीकार गरेको छ। स्रोतका अनुसार सरकारका जिम्मेवार तहबाट समेत बाहिरबाट उपत्यकामा आउनेहरूलाई प्रवेश दिन आदेश आउने गरेको समेत बताइएको छ ।
कोरोना महामारी फैलन सक्ने खतरालाई ध्यानमा राखेर काठमाडौं उपत्यकामा प्रवेशमा रोक लगाइएको अवस्थामा यसरी अन्धाधुन्ध मानिसहरुको प्रवेशले काठमाडौंमा महामारीको खतरा बढेको विज्ञहरुले बताएका छन् । यसैबीच कोरोनाको हब बन्दै गएको काठमाडौंको छिमेकी जिल्लाको रूपमा रहेको धादिङबाट पनि धेरै मानिसहरू हिंडेर तथा गाडीवाट उपत्यका प्रवेश गरिएको बताइएको छ ।
संघीय सरकार ,प्रदेश सरकार र स्थानीय सरकार मिलेर कोरोना नियन्त्रणको कार्य गर्नुपर्ने हो तर स्थानीय सरकारले निकै दवाव दिएपनि संघीय सरकारले यसलाई बेवास्ता गरेको देखिएको एक स्थानीय जनप्रतिनिधिले बताए ।