बोधगयामा महाछाडको अल्पकालीन श्रामणेर प्रवज्या हुँदै

अरविन्द सिंह ,सोनाम ,सुभाय् पोष्ट संवाददाता
बोधगया/ महाछाड महाबरमी फाउण्डेशनको आयोजनामा भगवान बुद्धले ज्ञान प्राप्त गरेको संवेजनीय स्थल भारतको बोधगयामा अल्पकालीन प्रवज्या कार्यक्रम हुँदैछ ।
सन् २०१७ देखि यस संस्थाको संयोजकत्वमा हरेक वर्ष हुँदै आइरहेको अल्पकालिन प्रबज्याको चौथो पटकको कार्यक्रम आज बिहीबार फेब्रुअरी ६ तारीखदेखि बोधगयाको महाबोधि मन्दिर परिसरमा सुरु भएको छ । यो कार्यक्रम फ्रेब्रुअरी १६ तारिखसम्म संचालन हुने कुरा संयोजक राकेश महर्जनले बताएका छ्न् । ।
यस कार्यक्रममा २ जना श्रद्धेय भिक्षुहरु २५ जना उपासक र २५ जना उपासिकाहरु संयोजक महर्जनको नेतृत्वमा हिजो बुधबार, फेब्रुअरी ५ तारिखका दिन नेपालबाट बुद्धगया आइपुगेको हो ।
कार्यक्रममा नेपाल लगायत थाईल्याण्ड, लाअोस, म्यान्मार, भियतनाम, कम्बोडिया , भारत र चीन(तिब्बत) बाट पनि श्रद्धेय भिक्षु र उपासक उपासिकाहरुको सहभागिता रहेको बताइएको छ । महाछाड महाबरमीका अध्यक्ष थाई उपासिका थानस्सारात थम्मचोटमोँखोलले यस कार्यक्रमको उद्देश्य बारे बोल्दै भन्नुभयो ” विश्व शान्तिको कामना तथा बौद्ध राष्ट्रका उपासक उपासिकाहरु बिचको भाईचारा र आपसी सम्बन्ध सुमधुर पार्नु नैं यस कार्यक्रमको मूल उद्देश्य हो ।”
कार्यक्रम संयोजक राकेश महर्जनको पहलमा नेपालका चारजना बालकहरु प्रब्रजित भई गत वर्षदेखि सोसंस्थाद्वारा संचालित बोधगयाको महाछाड विद्यालयमा अध्यनरत रहेका छन् । ती विद्यार्थीहरुलाई अाउँदो वर्ष थाईल्याण्डमा उच्च शिक्षाको लागि पठाउने तयारी समेत भई रहेको कार्यक्रम संयोजक महर्जनले बताए ।