महायोगी श्रीधर राणा रिम्पोछेद्वारा ‘महाकरुणासूत्रम्’ ग्रन्थ विमोचन, करुणाभावले मात्रै संसारमा शान्ति सम्भव

काठमाडौँ, १७ जेठ / लोटस रिसर्च सेन्टरको आयोजनामा बौद्ध दर्शनको एक अत्यन्तै महत्त्वपूर्ण ग्रन्थ ‘महाकरुणासूत्रम्’ (Maha Compassion Sūtra) को विमोचन तथा धर्मदेशना कार्यक्रम सम्पन्न भएको छ। ह्युमन लाइफ युनिभर्सिटीको प्रायोजनमा लोटस रिसर्च सेन्टरले सम्पादन तथा प्रकाशन गरेको यस ऐतिहासिक ग्रन्थको बौद्ध जगतका दिग्गज व्यक्तित्वहरूको उपस्थितिमा सामूहिक रूपमा विमोचन गरिएको हो।चिनियाँ भाषाबाट अनूदिद् यस ग्रन्थका मूल अनुवादक भारतीय त्रिपिटकाचार्य मास्टर नरेन्द्रयश हुन्। बौद्ध दर्शन, अनुसन्धान र साधनाका दृष्टिकोणले यो ग्रन्थ निकै अमूल्य मानिएको छ।
काठमाडौँमा आयोजित एक विशेष र गरिमामय समारोहका बीच महायोगी श्रीधर राणा रिम्पोछेको प्रमुख आतिथ्यमा ग्रन्थको विमोचन गरिएको थियो ।विमोचन समारोहमा प्रमुख अतिथिका साथै विशिष्ट बौद्ध विद्वान बज्र राज शाक्य, बागमती प्रदेश सभा सदस्य शैलेन्द्र मान बज्राचार्य, लुम्बिनी बौद्ध विश्वविद्यालयका उपकुलपति डा. मणिक रत्न शाक्य , लोटस रिसर्च सेन्टरका महासचिव अशोक नन्द बज्राचार्य लगायतले संयुक्त रूपमा पुस्तक सार्वजनिक गर्नुभएको थियो।