बाढीग्रस्त क्षेत्रमा ऊर्जा मन्त्री श्रेष्ठको निरन्तर अनुगमन : प्रभावकारी राहत, उद्धार र पुनःस्थापनामा सरकारको सक्रियता

काठमाडौं / ऊर्जा, जलस्रोत तथा सिँचाइमन्त्री विराज भक्त श्रेष्ठ रसुवाको भोटेकोशी नदीमा आएको विनाशकारी बाढीबाट प्रभावित क्षेत्रमा निरन्तर स्थलगत अनुगमन, निरीक्षण तथा आवश्यक समन्वयमा सक्रिय रहँदै आएका छन्। विशेषगरी बाढीबाट प्रभावित जलविद्युत् आयोजना, विद्युत् संरचना तथा प्रभावित बस्तीको अवस्था बुझ्न मन्त्री श्रेष्ठले विभिन्न क्षेत्रको भ्रमण गर्दै सम्बन्धित निकायलाई आवश्यक निर्देशनसमेत दिँदै आएका छन्।

बाढीपछिको वास्तविक अवस्था बुझ्न प्रभावित क्षेत्रमा पुग्दै आएका मन्त्री श्रेष्ठले क्षतिग्रस्त जलविद्युत् आयोजना तथा ऊर्जा संरचनाको स्थलगत निरीक्षण गर्दै उद्धार, राहत र पुनःस्थापनाका कार्यलाई प्रभावकारी बनाउन जोड दिएका छन्।

विनाशकारी बाढीबाट प्रभावित त्रिशूली–३ ‘ए’, माथिल्लो त्रिशूली–१ लगायतका जलविद्युत् आयोजनासँग सम्बन्धित क्षेत्रमा उनले क्षतिको अवस्था, कर्मचारीको सुरक्षा तथा विद्युत् संरचनामा पुगेको असरबारे जानकारी लिँदै आएका छन्।

मन्त्री श्रेष्ठले बाढी प्रभावित क्षेत्रमा सरकारले प्रभावकारी रूपमा राहत, उद्धार तथा पुनःस्थापनाका कार्यलाई अगाडि बढाइरहेको बताएका छन्। प्रभावित नागरिकको उद्धार, घाइतेको उपचार, राहत वितरण तथा क्षतिग्रस्त भौतिक र जलविद्युत् संरचनाको पुनःस्थापनाका लागि राज्यका सम्बन्धित निकायहरू समन्वयात्मक रूपमा परिचालित रहेको उनको भनाइ छ।

यसैक्रममा मन्त्री श्रेष्ठ छाउनीस्थित वीरेन्द्र सैनिक अस्पताल पुगेर रसुवाको भोटेकोशी नदीमा आएको विनाशकारी बाढीका कारण घाइते भएका जलविद्युत् आयोजनाका कर्मचारी तथा उद्धार गरिएका नागरिकसँग भेट गरेका छन्।

उनले त्रिशूली–३ ‘ए’ जलविद्युत् आयोजनाबाट उद्धार गरिएका नेपाल विद्युत् प्राधिकरणका मेकानिकल फोरम्यान सञ्जय साह र मेकानिकल सुपरभाइजर कबिर महर्जनको स्वास्थ्य अवस्थाबारे जानकारी लिएका छन्। मन्त्री श्रेष्ठले कबिर महर्जनका परिवारसँग समेत भेट गरी उनीहरूलाई हौसला प्रदान गरेका थिए।

त्यसैगरी, माथिल्लो त्रिशूली–१ जलविद्युत् आयोजनाबाट उद्धार गरिएका चिनियाँ नागरिक तथा स्याफ्रु क्षेत्रबाट उद्धार गरिएकी एक किशोरीसँग पनि मन्त्री श्रेष्ठले भेट गरेका छन्।

भेटका क्रममा घाइतेहरूको स्वास्थ्य अवस्था सुधारोन्मुख रहेको जानकारी प्राप्त भएको मन्त्री श्रेष्ठले बताएका छन्। बाढीको पानी र लेदोका कारण भएका घाउहरू क्रमशः निको हुँदै गएको तथा शारीरिक चोटपटकमा समेत सुधार भइरहेको उनको भनाइ छ।

यद्यपि, यस्तो प्रकृतिको ठूलो विपद्पछि शारीरिक उपचारसँगै प्रभावित व्यक्तिको मानसिक तथा मनोवैज्ञानिक स्वास्थ्यमा पनि विशेष ध्यान दिनुपर्ने आवश्यकता रहेको मन्त्री श्रेष्ठले औँल्याएका छन्।

बाढी प्रभावित क्षेत्रमा निरन्तर अनुगमन गर्दै आएका मन्त्री श्रेष्ठले सम्बन्धित निकायलाई उद्धार कार्यलाई प्रभावकारी बनाउन, प्रभावित नागरिकसम्म राहत पुर्‍याउन तथा क्षतिग्रस्त संरचनाको यथाशीघ्र पुनःस्थापना गर्न आवश्यक निर्देशन दिँदै आएका छन्।

उनले घाइतेहरूको उपचारमा खटिएका स्वास्थ्यकर्मी, उद्धार कार्यमा सक्रिय सुरक्षाकर्मी, प्राविधिक तथा उद्धारकर्मीप्रति हार्दिक धन्यवाद व्यक्त गरेका छन्।

विपद्को यो कठिन घडीमा प्रभावित नागरिकको उद्धार, उपचार, राहत तथा पुनःस्थापनाका लागि राज्यका सबै संयन्त्र जिम्मेवारीपूर्वक परिचालित रहेको उल्लेख गर्दै मन्त्री श्रेष्ठले प्रभावित परिवारसँग सरकार साथमै रहेको विश्वास व्यक्त गरेका छन्।

“विपद्को घडीमा सरकार प्रभावित नागरिकको साथमा छ र राहत, उद्धार तथा पुनःस्थापनाका कार्यलाई प्रभावकारी रूपमा अगाडि बढाउन सबै सम्बन्धित निकाय परिचालित छन्,” मन्त्री श्रेष्ठको भनाइ छ।