देविघाटको तादी नदीमा ५० टन क्षमताको एक्रो ब्रिज जडान गर्दै नेपाली सेना

नुवाकोट /बाढीपछि प्रभावित क्षेत्रमा यातायात सम्पर्क पुनःस्थापित गर्ने उद्देश्यले नेपाली सेनाको इन्जिनियरिङ युनिटले नुवाकोटको विदुर नगरपालिका–५ देविघाटस्थित तादी नदीमाथि एक्रो ब्रिज (Acrow Bridge) जडान कार्य तीव्र गतिमा अगाडि बढाएको छ।

नेपाली सेनाले ६० मिटर लामो र ५ दशमलव ५ मिटर चौडाइको उक्त पुल ढुवानी गरी तादी नदीमाथि जडान गरिरहेको छ। पुलको भारवहन क्षमता ५० टन रहेको बताइएको छ।

सेनाको प्राविधिक तथा इन्जिनियरिङ टोलीले शनिबारदेखि पुलका विभिन्न संरचना ढुवानी तथा फिटिङ कार्य सुरु गरेको हो। हाल पुल जडानको कामलाई तीव्रता दिइएको छ।

बाढीका कारण प्रभावित भएको देविघाट क्षेत्रको यातायात सम्पर्कलाई यथाशीघ्र पुनःस्थापित गर्ने उद्देश्यका साथ नेपाली सेनाले आवश्यक जनशक्ति, प्राविधिक उपकरण तथा सामग्री परिचालन गरी पुल निर्माण कार्य अगाडि बढाएको जनाएको छ।

तादी नदीमाथि निर्माणाधीन एक्रो ब्रिज सम्पन्न भएपछि स्थानीय बासिन्दा तथा प्रभावित क्षेत्रका नागरिकको आवतजावत सहज हुने अपेक्षा गरिएको छ। पुल सञ्चालनमा आएपछि गल्छी जाने बाटो खुल्छ । यातायात, राहत सामग्री ढुवानी तथा दैनिक आवागमनमा समेत महत्वपूर्ण सहजता पुग्ने विश्वास गरिएको छ।

विपद्पछि नेपाली सेना उद्धार, राहत तथा क्षतिग्रस्त पूर्वाधारको पुनःस्थापनामा निरन्तर सक्रिय रहँदै आएको छ। देविघाटमा एक्रो ब्रिज जडान कार्य पनि प्रभावित क्षेत्रको यातायात सम्पर्क पुनःस्थापना अभियानअन्तर्गत तीव्र गतिमा अगाडि बढाइएको हो।