विपद्को घडीमा रास्वपा काठमाडौंको रक्तदान अभियान तीव्र, चन्द्रागिरिपछि टोखा,दक्षिणकाली र काठमाडौं–१७ मा कार्यक्रम

काठमाडौं / भोटेकोशी बाढीबाट प्रभावित नागरिकप्रति ऐक्यबद्धता जनाउँदै राष्ट्रिय स्वतन्त्र पार्टी (रास्वपा) काठमाडौं जिल्ला समितिले रक्तदानलगायतका मानवीय सहयोगका कार्यक्रमलाई तीव्रता दिएको छ। जिल्ला समितिको आह्वानमा विभिन्न नगर तथा वडा समितिहरूले आ–आफ्नो क्षेत्रमा रक्तदान तथा राहत सहयोगका कार्यक्रम सञ्चालन गरिरहेका छन्।

यसैक्रममा रास्वपा चन्द्रागिरि नगर पालिका समितिले भदौ १२ गते शुक्रबार ‘रक्तदान जीवनदान हो’ भन्ने नाराका साथ रक्तदान कार्यक्रम सम्पन्न गरेको छ।  नगर समितिका सभापति जनार्दन के.सी. को संयोजकत्वमा आयोजित कार्यक्रममा रास्वपा काठमाडौं जिल्ला सभापति राजा शाक्य समेत सहभागी भएका थिए।

कार्यक्रममा सहभागी हुँदै सभापति शाक्यले भोटेकोशी बाढीमा परी ज्यान गुमाएका सबैप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेका छन्। उनले विपद्को समयमा राजनीतिक विभाजनभन्दा माथि उठेर मानवीय सेवामा सबै एकजुट हुनुपर्नेमा जोड दिएका छन्।

शाक्यले आफ्नो सन्देशमा भनेका छन्, “२०८३ साल भदौ १० गतेको भोटेकोशी बाढीमा परी ज्यान गुमाएका सबैप्रति हार्दिक श्रद्धाञ्जली, घाइतेहरूको शीघ्र स्वास्थ्यलाभको कामना गर्दछु। दु:खद समय छ, विपदको समय छ । राष्ट्रिय स्वतन्त्र पार्टी चन्द्रागिरि नगर  पालिका समितिले रक्तदान कार्यक्रम आयोजना गरेको  छ,यसैगरी अन्य कमिटीहरुले पनि यस बिपदको बेला अत्यावश्यक अवस्था हेरी रक्तदान कार्यक्रम राख्दैछ । सहभागी हुनुभइ सहयोग गर्नुहुन सबैमा अनुरोध छ।”

चन्द्रागिरिमा कार्यक्रम सम्पन्न भएसँगै रास्वपा टोखा नगर समिति , दक्षिणकाली नगर समितिले भदौ १३ गते शनिबार रक्तदान कार्यक्रम आयोजना गर्ने भएको छ। त्यस्तै, काठमाडौं महानगरपालिका वडा नं. १७ समितिले आइतबार रक्तदान कार्यक्रम आयोजना गर्ने तयारी गरेको छ।

जिल्ला समितिका अनुसार काठमाडौंका अन्य नगर तथा वडा समितिहरूले पनि क्रमशः रक्तदानलगायतका मानवीय सहयोगका कार्यक्रम सञ्चालन गर्नेछन्। रक्तदानसँगै राहत, उद्धार तथा विपद् प्रभावितलाई आवश्यक सहयोग पुर्‍याउने अन्य कार्यक्रमहरूलाई समेत सँगसँगै अगाडि बढाइने जिल्ला समितिले जनाएको छ।

जिल्ला सभापति शाक्यले विपद्को यस्तो कठिन समयमा पार्टीका सबै तहका समिति, कार्यकर्ता तथा आम नागरिकलाई मानवीय सेवामा एकजुट भएर अगाडि बढ्न आग्रह गरेका छन्।

“विपद्को समयमा सबै एकजुट भएर सहयोग र उद्धारमा लाग्नु नै अहिलेको मुख्य आवश्यकता हो,” शाक्यले भनेका छन्।