प्रमुख विज्ञ सल्लाहकार डा. प्रधानद्वारा सामुदायिक स्वास्थ्य सेवा परिषद्को निरीक्षण

काठमाडौं, असोज ३ । स्वास्थ्य मन्त्रालयका प्रमुख विज्ञ सल्लाहकार डा. मनोहरलाल प्रधानले डल्लु आवास, स्वयम्भूस्थित सामुदायिक स्वास्थ्य सेवा परिषद्को निरीक्षण भ्रमण गर्नुभएको छ।

निरीक्षणका क्रममा परिषद्का मेडिकल सुपरिटेन्डेन्ट प्रा. डा. बुलन्द थापाले परिषद्बाट सञ्चालन हुँदै आएका स्वास्थ्य सेवा, विशेषज्ञ उपचार, स्वास्थ्य परीक्षण तथा प्रयोगशाला सेवाबारे जानकारी गराउनुभयो।

कार्यक्रममा परिषद्का कार्यसमिति सदस्य मोहनकृष्ण श्रेष्ठले समुदायमा स्वास्थ्य सेवा विस्तारका क्रममा देखिएका समस्या तथा चुनौतीबारे जानकारी दिनुभयो। जनशक्ति, स्वास्थ्य उपकरण, पूर्वाधार र अस्पताल सञ्चालनका विषयमा समेत छलफल भएको थियो।

स्थानीय बासिन्दाले समुदायमै सहज र गुणस्तरीय स्वास्थ्य सेवा विस्तारका लागि सम्बन्धित निकायको सहयोग र समन्वय आवश्यक रहेको बताएका थिए।

कार्यक्रममा राष्ट्रिय स्वतन्त्र पार्टी काठमाडौं जिल्ला सभापति राजा शाक्यले समुदायको सहभागितामा सञ्चालन भइरहेका स्वास्थ्य संस्थालाई थप व्यवस्थित र प्रभावकारी बनाउन सहकार्य आवश्यक रहेको बताउनुभयो।

परिषद्का अध्यक्ष केसरबहादुर मानन्धरको अध्यक्षतामा सम्पन्न कार्यक्रम महासचिव दीपकचन्द्र गौतमले सञ्चालन गर्नुभएको थियो।