लुम्बिनी बौद्ध विश्वविद्यालयको उपकुलपतिमा डा. माणिकरत्न शाक्यले पाए जिम्मेवारी

दिपक बिके, लुम्बिनी/लुम्बिनी बौद्ध विश्वविद्यालयको रिक्त रहेको उपकुलपति (भाइस-चांसलर) पदमा विश्वविद्यालयका बौद्ध अध्ययन संकायका पूर्व डिन एवं सह-प्राध्यापक डा. माणिकरत्न शाक्यले जिम्मेवारी प्राप्त गर्नुभएको छ। विश्वविद्यालयमा उपकुलपति पद रिक्त रहेको सन्दर्भमा प्राज्ञिक र प्रशासनिक नेतृत्वलाई सुदृढ रूपमा अगाडि बढाउन डा. शाक्यलाई यो महत्त्वपूर्ण जिम्मेवारी सुम्पिएको हो।

नवनियुक्त उपकुलपति डा. शाक्य बौद्ध धर्म, दर्शन, अनुसन्धान र प्राज्ञिक क्षेत्रमा एक स्थापित एवं अत्यन्त प्रतिष्ठित नाम हुनुहुन्छ। उहाँले यसअघि विश्वविद्यालयको बौद्ध अध्ययन संकायको डिनका रूपमा अत्यन्तै सफल र उदाहरणीय नेतृत्व प्रदान गरिसक्नुभएको छ। उहाँको कार्यकालमा विश्वविद्यालयले अन्तर्राष्ट्रिय प्राज्ञिक सम्बन्ध विस्तार, उच्चस्तरीय अध्ययन-अनुसन्धान र बौद्ध दर्शनको प्रवर्द्धनमा उल्लेख्य प्रगति हासिल गरेको थियो।

विश्वविद्यालयको गरिमालाई उच्च राख्दै बौद्ध शिक्षा, संस्कृति र पुरातात्त्विक अनुसन्धानलाई विश्वस्तरमा स्थापित गर्न डा. शाक्यको सक्षम नेतृत्व कोशेढुङ्गा सावित हुने विश्वास आम प्राज्ञिक वर्गले लिएको छ। एक दूरदर्शी बौद्ध विद्वान, कुशल अनुसन्धानकर्ता र प्रखर प्राध्यापकका रूपमा परिचित डा. शाक्यले जिम्मेवारी सम्हालेसँगै विश्वविद्यालयका प्राज्ञिक तथा नीतिगत गतिविधिहरूले थप गति लिने अपेक्षा गरिएको छ।