पोखरामा भैरव मन्दिरमा श्री भैरवको प्राण प्रतिष्ठा सम्पन्न

पोखरा / गण्डकी: काठमाडौँ उपत्यकाको प्राचीन नेवार सभ्यता र संस्कृति झल्काउने उद्देश्यले पोखराको भैरवटोलमा निर्माण गरिएको श्री भैरव मन्दिरमा आज (कात्तिक २६ गते) भव्यताका साथ प्राण प्रतिष्ठा पूजा सम्पन्न भएको छ। यो मन्दिर निर्माण गर्नका लागि रु एक करोड ७० लाख ८८ हजार ६१५ को लागत लागेको छ।
मन्दिरमा भैरवको प्रस्तर (शिला) प्रतिमाको प्राणप्रतिष्ठा पूजाका लागि काठमाडौँबाट विशेष रूपमा आउनुभएका बज्राचार्य गुरुज्यूहरूले नेतृत्व गर्नुभएको थियो। उहाँहरूले बज्रयान परम्परा र तान्त्रिक विधिअनुसार सम्पूर्ण धार्मिक अनुष्ठानहरू सम्पन्न गर्नुभएको हो।
यस महत्वपूर्ण कार्य सम्पन्न भएसँगै, आज मध्यान्ह २ बजेबाट भक्तजनहरूका लागि मन्दिरमा दर्शन र पूजन का लागि ढोका खुल्ला गरिएको छ।
भैरव सांस्कृतिक संरक्षण समितिका अध्यक्ष तीर्थमान प्रधानाङ्गका अनुसार, पोखरामा नेवार समुदायको आगमनसँगै काठमाडौँ उपत्यकाका सांस्कृतिक परम्पराहरूलाई यहाँ निरन्तरता दिँदै आएको छ।
उहाँले भन्नुभयो, “यो मन्दिरले यहाँको नेवार समुदायले पुस्तौँदेखि निरन्तरता दिएका परम्पराहरू— जस्तै: गण नृत्य (बाह्र भैरव नृत्य), भजन तथा नेवार अनुष्ठानहरू लाई थप बलियो बनाउने र सांस्कृतिक केन्द्र को रूपमा काम गर्नेछ।”
अन्तमा, यस ऐतिहासिक निर्माण कार्यलाई सफल पार्न पहल गर्ने भैरव सांस्कृतिक संरक्षण समिति लगायत सम्पूर्ण सहयोगी व्यक्तित्व, दानदाता एवं योगदानकर्ताहरूमा हार्दिक सम्मान र कृतज्ञता व्यक्त गरिएको छ।