बाखं मखुगु बाखं

(चिबाखँ)
–महर्जन रत्न
छगू पार्कय् नाप लायेगु खँ क्वःजित ।
सिड्नी यक्व व्यवस्थित पाकर्त दु । पार्कय् च्वनेत नयेते छिंक मेच टेबुलया व्यवस्था नं यानातःगु दु ।
जि ट्रेनं अष्ट्रेलिया हे शान, हार्वर ब्रीज, ओपेरा हाउस बांलाक खनेदु सर्कलर की स्टेशनय् कुहां वना । अले अन लिक्क सं च्वंगु येंया रत्नपार्क थेंजाःगु स्वंगु गुणाति तधंगु पार्कय् थ्यंबलय् इपिं वइ च्वने धुंकल । मां व म्ह्याय् ।
निम्हं उथें उथें च्वं मां म्हाय् मखु तःकेंहें धाये ल्वः ।
म्हाय्म्ह भचा ध्यांग्री । मांम्ह नं भचा ल्ह्वं ।
म्ह्याय् नर्स । च्ल् हँ । दुःखया खँ म्ह्याय्म्हेसिया भात छगू एक्सिडेन्टय् मदुगु जुयाच्वन ।
–“छिनाप छता खँ ल्हाये धकाः थन सःतागु । उखुन्हु प्रोग्रामय् परिचय जक यायेथें जुल । खँ बांलाक मजू”– मांम्हसिनं धाल ।
–“उकिं हे जि नं वैगु । जिगु नं खँ दु ल्हायेगु । छिकपिं ला थन झायाः व्यवसाय यानाच्वंगु यक्व दयेधुकंल ।” जिं धया ।
मांम्हं भचा संकुचित जुजुं धाल – “ग्व खँ गथे सुरु याये ।”
“धैदिसंले” जिं धया ।
–“उखुनु प्रोग्रामय् छितः खँसांनिसें म्ह्याय्नं छिप्रति नुगः क्वसाल धैच्वंगु ।
छि नं याकः हे थें च्वं थन,उमेर नं उलि मपाः थें च्वं । मिले जूसा म्ह्याय् नाप छिं इहिपा यानादीला धकाः ?”
अस्ट्रेलियाय् नर्स जूयाः ज्या यानाच्वंम्ह जूसां नं म्ह्यायम्ह मछाःगु खनेदु ।
माम्हसिया खँ न्यनाः जि नं झस्कय् जुल । छु धाःगु जुइ, मतिइ वल ।
इमिगु नेपालं अस्ट्रेलिया पलायनया खँ धायेगु खःसा नेपालय् माओवादी द्वन्दकालय् माओवादीतय्सं भातम्हेसित स्यानाबिइवं अस्ट्रेलियाय् राजनीतिक संकटय् लाःपिं पीडित कथं म्ह्याय्यात ज्वनाः मांम्ह अस्ट्रेलियाय् वःगु जुयाच्वन ।
अले थन हे म्हाय्म्हं नं बांलाक ब्वन । मांम्ह मेहनत यासें व्यवसाय यानाः छगू तधंगु इभेन्ट होम व रेस्टुरेन्ट चायेकाः बांलाःगु अवस्थाय् थ्यनेत ताःलाःगु जुयाच्वन ।
थःगु व्यवसाय दुपिं जूगुलिं इमिसं धाल कि वर्क पर्मिट मदुगु टुरिष्ट भिसाय् वैम्ह जिनं, वर्क पर्मिट काये दइ धैगु आशा कयाः नाप लाःवनाम्ह जि ।
तर इहिपाया खँ । व नं म्ह्याय् नाप । जितः गुलि कम उमेरया मनू खंगु खः इमिसं ।
छगु ज्याझ्वलय् नाप लाःबलय् छम्ह दाजुं ख्याः यायां “थ्व छम्ह दनिका इहिपा मजूनिम्ह थें च्वंम्ह” धकाः धाःगु व म्ह्याय्म्हं नीयानाः काःगु जुयाच्वन ।
नापलानाया खँ थन थ्यने सातकि अष्ट्रेलियाय् अवसर चुलाइगु अवस्था दुसां जिं धाये माल,
–“जि थन काय् थाय् वैच्वनागु खः।”
इपिं वातांहा जुल ।
–“खैमखु जुइ छि नं गुलि ख्याः यायेमाःगु ?”मांम्ह धाल ।
जब जिं थत प्रमाणित याना, म्ह्याय्म्हं मछापहः वसां तीजक नुगः उलाः धाल –“जिं छितः मनंनिसें येकागु । यिखभ बत ाष्चकत कष्तभ धायेला छुधाये ! छिगु पर्सनालिटी खनाः जि तस्कं प्रभावित जुया । जितः छि सिक्क हे यल ! ”
–“अथे ला फिल्मय् जक जुइका,मखुला”– जिं धया ।
–“जिं सिल छि कलाः दुम्ह धकाः परिवार दुम्ह धकाः अय्नं छिनाप जि रिलेसनय् च्वनेत तयार दु । जिनाप इहिपा या धायेमखु तर जिनाप सतिना च्वनादिसं । जिगु छें छितः न्ह्याब्लँय्ं लसकुस दु ।”
म्हाय्म्हं नुगः उलाः याउँक नवाःगुलिं मांम्हं नं संतुष्ट जूगु खनेदु ।
जि धाःसा अलमल जुल । छु याये छु धाये । अस्ट्रेलियाया पिआर कायेदइगु संभावना । अस्ट्रेलियाय् ज्या, प्रोपर्टी नं दैगु आस ।
अयनं जिं थथे हे धकाः धाये मफुत ।
मांम्ह धाल –“छिं नं बिचाः यानादिसं । बिचाः यानाः लिसः बियादिस ।”
पार्कय् च्वनाः खँल्हाल्हां समुद्रय् सुद्र्य लुकुंबित । खँ अथें थाति तयाः जिपिं पार्क पिहांवया । म्ह्याय्म्हं कार चले यात । इमिसं जितः छेंतक कारं त्वताबिल । कार बाय्क याम्ह वं आशावादी ख्वालं स्वयावन ।
छें चुंच्वनाम्हेसिया मनय् धौबजि वालाच्वन ।
(क्यानबेरा,ऋबलदभचचब ,घ यअत द्दण्द्दघ)