कविताया लाय्‌कूुया न्हूधा:

ने.सं. ११४५ कौलागाः ११ शुक्रवाः, २०८२ असोज ३१ गते कुन्हु कविताया लाय्कूया न्हापांगु अधिवेश(न्हूधाः) जुल । कविताया लाय्कूया नायः डा. ज्योति प्रभा तुलाधरया अध्यक्षताय् न्ह्याःगु उगु दँमुँज्यापाखें हाकनं डा. ज्योति प्रभा तुलाधरयात सर्वसम्मतं नायः ल्यःगु खः । अथे हे न्वकू हिसिलिना शाक्य व बिनिता बज्राचार्य, छ्याञ्जे रजनीमिला, दाँभरिं रहेना नकःमी मानन्धर सर्वसम्मतं ल्यःगु खः । मुँज्यां दुजःपिं मंजु सिंह श्रेष्ठ, विणा नेम्कुल, दिल कुमारी महर्जन, यचु महर्जन, शोभा महर्जन, मन्दिरा श्रेष्ठ व कृता बज्राचार्यपिं ल्यःगु खः । ज्यासना पुचःया १५म्ह दुजः मध्ये १२ म्ह सर्वसम्मतं ल्यःगु खःसा कविताय् ख्यलय् सक्रियपिं मेपिं स्वम्ह मिसा कविपिं मनोनयन यायेगु खँ क्वःज्यूगु खः ।

मुँज्याय् छ्याञ्जे रजनीमिलां छ्याञ्जेया प्रतिवेदन व दाँभरिं रहेना नकःमी मानन्धरं दाँभरिंया प्रतिवेदन न्ह्यब्वयादीगु खः ।

न्हूगु ज्यासना पुचःया न्हापांगु मुँज्या नं म्हिगः शुक्रवाः हे नायः डा. ज्योति तुलाधरया अध्यक्षताय् च्वंगु जुल । छ्याञ्जे रजनीमिलां सँस्थाया नियमावली व कार्य योजना न्ह्यब्वयादीगु खः । कार्ययोजना कथं नेपालभाषाया अग्रज व न्हू पुस्ताया स्थापित कविपिं व नेपाली भाषाय् स्थापित नेवाः कविपिंगु छगू वैचारिक पुचः नीस्वनेगु ज्या जुल । डा. आनन्द जोशी, डा. केशवमान शाक्य, प्रतिसरा साय्मि, नर्मदेश्वर प्रधान, डा। पुष्पराज राजकर्णिकार, नवीन चित्रकार, पुष्परत्न तुलाधर, श्रीराम श्रेष्ठ, धु्रव मधिकर्मी, नारद बज्राचार्य, लक्ष्मी माली, सुरेश किरण, ईश्वरी मैयाँ श्रेष्ठ, केदार श्रेष्ठ, सुशील राजोपाध्याय, अभय श्रेष्ठ, रामगोपाल आशुतोष, रमी प्रिया, बसन्त नकःमी, नवीन प्रकाश श्रेष्ठ, रासा, तुयु पुँ, सुधीर ख्वबिपिन्त कविताया लाय्कूया मानार्थ दुजः कथं उगु पुचलय् मनोनयन यायेगु ज्या जुल ।
नापं आः याकनं नायः डा. ज्योति तुलाधरया आधुनिक काव्यय् विद्रोहया सः नांया सफु चिखिफ्यने, कवि ब्वमि अन्तरसंवाद, कविता कन्सर्ट ज्याझ्वः नं मुँज्यां पारित याःगु खः । कविताया लाय्कूया न्हूधाः ख्वपया बाचामरीच्वंगु सिटि गाउँ होटलय् जूगु खः ।