स्विट एन सादर टक विद सज्जु ज्याझ्वःया न्हापांगु सिजन क्वचाल

यें/गणेशदेवी मेमोरियल फाउण्डेसनया ग्वसालय् नेवाः एचडी टिभीपाखें प्रशारित Sweet & Sour Talk with Sajju ज्याझ्वःया न्हापांगु सिजन क्वचाःगु लसताय् छगू ज्याझ्वः जुल ।

वंगु शनिवार ऐतिहासिक सम्पदा नगर किपूया १० वडाय् च्वंगु जोशीननी हेरिटेज होम एण्ड नेवाः रेस्टुरेन्टय् जूगु उगु ज्याझ्वलय् संगीत ख्यःया सकृय व्यक्तित्वपिं गायक सज्जु मानन्धर व म्येच्वमि प्रा.डा राजु मानन्धरया मांया लुमन्तिइ स्थापित गणेशदेवी मेमोरियल फाउण्डेसनया ग्वसालय् नेवाः एचडी टिभीपाखें प्रशारित Sweet & Sour Talk with Sajju… ज्याझ्वःया न्हापांगु सिजन क्वचाःगु लसताय् हंगु खः ।

नेपालभाषा कला संस्कृति, संस्कारया नापनापं गीतसंगीत, चलचित्र कलाकार, पत्रकार, खेल जगत, साहित्य व समालोचकलिसे भाषा, कला संस्कृति, संस्कार व साहित्य सम्बन्धी विज्ञ लिसेया खँल्हाबल्हा ज्याझ्वःया न्हापांगु सिजन क्वचाःगु लसताय् उगु ज्याझ्वलय् सभापति नेवाः एचडी टेलिभिजका महाप्रबन्धक नविन जोशी, मूपाहाँ कीर्तिपुर नगर प्रमुख कृष्णमान डंगोल, विशेष पाहाँपिं संगीतविज्ञ दीप तुलाधर, राजु सिंह, अनिल शाही, जुगल डंगोल, वरिष्ठ गायक जुजुकाजी रन्जित, गणेशदेवी मेमोरियल फाउण्डेशनया नायः स्नेह सायमि, वरिष्ठ रचनाकार लेखक व निर्देशक पवन जोशी, नेपाः टिभी महाप्रवन्धक रामकृष्ण खड्गी, भाषाविज्ञ पौभाः सायमि व इलोहं प्रकाशनया संपादक दर्शणवीर शाक्यया विशेष उपस्थिति दूगु खः ।

समाजसेवी दिल बहादुर मानन्धरपाखें स्व. गणेशदेवी मानन्धरया किपातय् स्वांमाः देछाना न्ह्याःगु उगु ज्याझ्वलय् लसकुस न्वचु Sweet & Sour Talk with Sajju या निर्माता डा. राजु मानन्धरं तयादिल ।

Sweet & Sour Talk with Sajju यात ग्वाहालि यानादीपिं सकसित मतिनाया चिं देछाःगु उगु ज्याझ्वलय् फोटो पत्रकार विकम खड्गी व टिकटक स्टार ध्रुव कपालीयात विशेष सम्मान देछाःगु खः ।

अथेहेतुं छगू हे परिवार जोशी परिवारया दुजःपिंमध्ये वरिष्ठ लेखक निर्देशक पवन जोशी नेवाः एचडी टिभीका महाप्रवन्धक नविन जोशी, नेवाः एचडीया क्यामरा पर्सन अविनव जोशी व सिइओ सर्मिला जोशीयात नं मूपाहाँ कृष्णमान डंगोलपाखें सम्मान याःगु खः ।
लोकंह्वाःम्ह म्येहालामि सविना मानन्धरं न्ह्याकुगु उगु ज्याझ्वलय् थीथी सांगीतिक प्रस्तुति नं न्ह्यब्वःगु खः ।