रुसी सेनापतिको मस्कोमै हत्या गर्न कसरी सफल भए युक्रेनी जासुस ?

मस्कोमा एउटा विद्युतीय स्कूटरमा लुकाइएको बम विस्फोट हुँदा रुसका लेफ्टिनन्ट जनरल इगोर किरिलोफ मारिएको छ । उनलाई युक्रेनी गुप्तचरहरूले मारेको दाबी गरिएको छ । वरिष्ठ रुसी जनरलको हत्या गर्न युक्रेनी जासुसहरू कसरी मस्को पुगे भनी प्रश्न उठेको छ भने रुसी सुरक्षामा पनि प्रश्न चिन्ह उठेको छ ।उता युक्रेनी गुप्तचरहरूले युक्रेनविरुद्ध युद्धमा संलग्न रुसका उच्च सैन्य अधिकारीहरूलाई “जहाँ भेटिन्छ त्यहीँ“ कारबाही गर्न थालेको युक्रेनी सुरक्षा र गुप्तचर सेवामा रहेका स्रोतहरूले पुष्टि गरेको बीबीसी न्यूजले बताएको छ ।
यस किसिमका कारबाही रुसभित्र,रुसले कब्जा गरेका युक्रेनी भूभागमा, र अरू देशमा पनि हुन सक्ने उनीहरूले बताएका छन् । मस्कोमा एउटा विद्युतीय स्कूटरमा लुकाइएको बम विस्फोट हुँदा रुसका लेफ्टिनन्ट जेनरल इगोर किरिलोफ मारिएको घटनालाई सैन्य विशेषज्ञ तथा युक्रेनका भूतपूर्व गुप्तचर अधिकारी इभान स्तुपाकले इजरेली गुप्तचर निकाय ‘मोसाद’ले यसअघि हिज्बुल्लाहमाथि गरेको ‘पेजर आक्रमण’सँग तुलना गरेका छन्।
रुसी सैन्य जेनरलको हत्यासँगैे मस्कोको शान्ति खल्बलिएको छ ।
युक्रेनले औपचारिक रूपमा किरिलोफमाथि भएको आक्रमणबारे कुनै प्रतिक्रिया व्यक्त गरेको छैन ।