वाग्मतीमा तामाङ र नेपाल भाषा सरकारी कामकाजको भाषा बनाएकोमा स्वागत

वाग्मतीमा तामाङ र नेपाल भाषा सरकारी कामकाजको

वाग्मती प्रदेशमा नेवार भाषा र तामाङ भाषालाई सरकारी कामकाजको भाषाको रुपमा प्रचलनमा ल्याउने भएपछि तामाङ र नेवार समुदायका अगुवालगायत संघसंस्थाहरुले प्रदेश सरकारलाई धन्यवाद दिनुको साथै खुसी व्यक्त गरेका छन् ।
यसैक्रममा नेवार राष्ट्रिय संगठन नेवा: देय् दबू , तामाङ समुदायको नेपाल तामाङ घेदुङले संयुक्त वक्तव्य निकाली बागमती प्रदेशको यो निर्णयलाई स्वागत गर्दै धन्यवाद ज्ञापन गरेको छ ।

लामो समयदेखि यस यस प्रदेशको कामकाजको भाषा नेवार भाषा र तामाङ भाषा हुनुपर्ने माग गर्दै भाषिक अभियन्ताहरुले प्रदेश सभामा माग गरिरहेका थिए भने गत सोमबार वाग्मती प्रदेशसभामा प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक सर्वसम्मतिले पारित भएसँगै तामाङ र नेवारी भाषा सरकारी कामकाजको भाषाको रुपमा प्रचलनमा आउने निश्चित भएको हो ।

भाषा आन्दोलनमा सघाइरहेका प्रदेश सरकारका संस्कृति, पर्यटन तथा सहकारी मन्त्री पुकार महर्जनले प्रस्तुत गरेको विधेयकमाथि छलफलपछि सोमबार सभामुख भुवनकुमार पाठकले निर्णयार्थ पेस गरेका थिए ।

अब प्रदेशसभा सचिवालयले प्रदेश सरकारी कामकाजको भाषा सम्बन्धमा व्यवस्था गर्न बनेको विधेयकलाई प्रदेश प्रमुखसमक्ष प्रमाणीकरणका लागि पठाइने छ । प्रदेश प्रमुखले प्रमाणित गरेपछि प्रदेश सरकारको आन्तरिक मामिला तथा कानुन मन्त्रालयले राजपत्रमा प्रकाशित गर्नेछ । राजपत्रमा प्रकाशित भएको मितिले १ सय ८० दिनपछि प्रदेशसभाबाट पारित विधेयक लागू हुनेछ ।
जनगणना-२०७८ अनुसार वाग्मती प्रदेशका १३ जिल्लामा तामाङको जनसंख्या १२ लाख १६ हजार ५ सय १७ छ । प्रदेशको कुल जनसंख्याको १९.८८ प्रतिशत तामाङ समुदाय छन् भने यस प्रदेशमा नेवार समुदायको जनसंख्या १५.५७ प्रतिशत अर्थात १२लाख ५२ हजार ४ सय ६० छ ।