साउथ अष्ट्रेलियामा येंया:पुन्ही( इन्द्रजात्रा)फेस्टिभल हुने

एडिलेड अस्ट्रेलिया / गुठी साउथ अष्ट्रेलियाको आयोजनामा साउथ अष्ट्रेलियामा येंया: पुन्ही( इन्द्रजात्रा) फेस्टिभल हुने भएको छ।

अक्टोबर १ मा क्रसग्रोव हल क्लोवेल्ली पार्कमा छैठौं येँया पुन्ही इन्द्र जात्रा फेस्टिभल हुन लागेको हो।
काठमाडौं उपत्यकामा प्राचीन कालदेखि निकै हर्षोल्लासपूर्ण रुपमा मनाइने येंया पुन्हीको पर्व विशेषको येंया: (इन्द्र्क्जात्रा) नेपालकै महत्त्वपूर्ण सम्पदा हो ।

गुठी साउथ अष्ट्रेलियाका सहसचिव सजिन प्रधानाङ्गका अनुसार फेस्टिभलमा काठमाडौंमा जस्तै धिमे बाजाको तालमा लाखे, पुलुकिसिको नाचसहित कुमारी जात्रा गरिनेछ । यो पर्व समयबजी विशेष भएको कारण समयबजि पनि यस फेस्टिबलमा समावेश गरिने छ । बज्रयान बौद्ध धर्ममा आधारित नेपालमण्डलको प्राचीन शास्त्रीय नृत्यका रुपमा लिइएको कुमारी , ब्रजयोगिनी , पञ्चबुद्घ तथामञ्जुश्रीको चर्या नृत्य पनि यस फेस्टिबलमा प्रस्तुत गरिने छ ।

कार्यक्रम दिउँसो २ बजेदेखि सुरु हुने तथा प्रवेश निःशुल्क गरिएको पनि आयोजकले जानकारी गराएको छ ।

नेपालका प्राचीन नेवार सम्पदा संस्कृतिलाई विश्वमाझ चिनाउँदै लैजानुका साथै यस्ता महत्त्वपूर्ण अमूर्त सम्पदा रीतिरिवाज, कला संस्कृतिलाई साउथ अष्ट्रेलियावासीबिच चिनाउने प्रयास स्वरूप इन्दजात्रा फेस्टिभल गर्न लागिएको पनि आयोजकले बताएको छ ।

२०१५ मा स्थापना भएको गुठी साउथ अष्ट्रेलियाले नेवा संस्कृति संरक्षण र संवर्धन गर्ने उदेश्यका साथ विभिन्न कार्यक्रम गर्दै आइरहेको छ ।