गुथि अष्ट्रेलियाया छगू म्हसीका

श्याम सैंजु , सिड्नी 
सन १९९७ स अष्ट्रेलियाय् गुथि अष्ट्रेलिया स्थापना जुल । उगु इलय् नेपालं नकतिनि अष्ट्रेलियाय् वयेगु थन च्वना: ज्या सनेगु ज्या न्ह्या:गु ई ख: ।  उब्लय् सिड्नी दुपिं नरेन्द्र श्रेष्ठ, पदम शाक्य, पुरन सामि, डा. नारायण प्रधान लगायत नेवाःत मिले जुयाः, नेवाः भाय्, तजिलजि व नेवाः संस्कृतियात संरक्षण यानाः ब्वलंकेगु आज्जु तयाः गुथि अष्ट्रेलिया स्थापना जूगु ख: । सुरु ला वास्तवय् नेवा:तय् गुथिया अवधारणा कथं गुथि अष्ट्रेलिया पलिस्था जूगु ख: । लिपा नेवा:तय् सवालय् थीथी मुद्दाय् ज्या यायेगु लिसें भाषा संस्कृति व तजिलतिया ज्या न्ह्या:गु ख: ।
सन् २०१० ल्यायम्ह पुस्ताया नेतृत्वय् गुथि न्ह्याकेगु तातुनाकथं संस्था अष्ट्रेलिया सरकारया नियमकथं विधिवत् रुपं नन प्रफिटेबल अर्गनाइजेसनया रुपय् दर्ता यासें उब्लय् सक्रिय जुयाच्वनादीम्ह मय्जु डा. नीलम प्रधानाङ्गयात न्हापांम्ह नाय:(अध्यक्ष ) कथं ल्यया: कार्य समिति दयेका: ज्या न्ह्याकल।  उगु इलय् थीथी कथं धिसिमिसि धाःगु थी थी ज्याझ्वः न्ह्यब्वयाः गुथि अष्ट्रेलियां नेवाः भाय्, नेवाः तजिलजि झझ: धायेक दँय्दँसं हनाः यंकेगु  कुतः जुल । गुगु आतक नं न्ह्यानाच्वंगु दु ।
गुथि अष्ट्रेलियापाखें जुयाच्वंगु थी थी ज्याझ्वःत न्ह्याकेगु झ्वलय्
हरेक दँय् मोहनी स्वन्ति नखः माने यानाः, म्हपुजा यानाः न्हूद हनेगु, पुलुकिसि, जन्माःद्यः सालेगु, येँयाः पुन्ही, पाहांच:हे, सकिमना पुन्हि, स्वांयाः पुन्हि,यःमरि पुन्ही हनेगु याना वैच्वंगु दु । नापं च्यादझिदं दुपिं  नेवाः म्ह्याय् मस्तय्त सामुहिक इही यायेगु ज्याझ्वः नं न्ह्याःगु जुल । सिद्नी अष्ट्रेलियाय्, दकलय् न्हापां सन २०१७ निसें गुथि अष्ट्रेलियापाखें न्ह्यज्याका: सामुहिक इही सुरु या:गु ख:। थ्व ईं तक च्याक्व:गु इही मुंकेगु ज्या जुइ धुंकुगु दु ।
थ्व दँय् वंगु मार्च ५ खुन्हु झिंस्वम्ह मस्तय्त इही यानाः नेवा:  तजिलजियात निरन्तर  न्ह्यज्याकेगु ज्या जुगु ख: ।
गुथि अष्ट्रेलियां थ्व हे वंगु २०२२ दँया सेप्टेम्बर ३ खुन्हु, गुथि ब्वनेकुथिया नामं स्कुल चायेकाः सिद्नी च्वंपिं नेवाः मस्तय्त  नेवाः भाय्, व नेवा प्याखं स्यनेगु ज्याझ्वः नं सुरु याःगु दु ।
नापनापं, गुथि अष्ट्रेलियां भुतिमालि जात्रा (काइत फेस्तिवल), नेपाल
फेस्तिवलय् स्यल्लाःगु तिब: बीगु व झी देय्या नांजाःपिं मेहालमिपिं सिद्नि ब्वना: थी ज्याझ्वःत यानाच्वंगु दु ।
गुथि अष्ट्रेलियाया लिपायागु आज्जु धैगु, इही ज्याझ्वः लिपा थ्यंक नं
यानायंकेगु, थ:गु तजिलजि, जात्रा, पुन्ही माने यायेगु, खिं व धिमे बाजं स्यनेगु,नेपाल लिपि व रन्जना लिपि नं स्यनेगु आज्जु कयात:गु दु । गुथि अष्ट्रेलियाया नायः भाजु उमेश नापितं थौकन्हय् या ज्याझ्व:या नेतृत्व यानाच्वना दीगु दु । भाषा संस्कृति स्कूलया संयोंजक च्वमि स्वयं पाखें यानावयाच्वनागु खँ न्ह्यथने दया: लय् ता: व:!