मिसा साहित्यकारपिसं शताब्दी पुरुष लुमंकल

मिसा साहित्यकार मुनाया ग्वसालय् शताब्दी पुरुष सत्यमोहन जोशी लुमन्ति ज्याझ्व: जूगु दु ।
यलया बखुं बहालय् मदुम्ह सत्यमोहन जोशीया छें लोक साहित्य परिषदया हलय् जूगु उगु ज्याझ्वलय् थीथी साहित्य व च्वसू त न्ह्यब्वसें सताब्दी पुरुष जोशीयात लुमंकेगु ज्या जूगु ख: ।
ज्याझ्वलय् सुन्दर कृष्ण जोशी मूपाहां , लुम्बिनी बौद्ध विश्वविद्यालयया डीन प्रा.डा. माणिक रत्न शाक्य विशेष पाहांकथं झायादीगु ख: । अथे हे लोक साहित्य परिषदया राजित श्रेष्ठ, साहित्यकार प्रतिसरा साय‌्मि लोककवि राजभाइ जक:मि , अनुरा श्रेष्ठं पाहांकथं ब्वति कयादीगु ख: ।
ज्याझ्वलय् थीथी विधाया मिसा साहित्यकारपिं मिना बज्राचार्य, रिता महर्जन, दिव्या ताम्राकार, रेणु श्रेष्ठ, अमीरमैंया रञ्जित, प्रतिशरा सायमि, बद्रि वेदना, विमलप्रभा बज्राचार्य,मिलन शाक्य. मिनर्वा शर्मा राजोपाध्याय लगायतपिसं शताब्दी पुरुष सत्यमोहन जोशी लुमंका रचना पाठ यानादीगु खः । अथे हे लोकाकवि राजभाइ जक:मि,सुरेश प्रधान, रामेश्वर मिश्रण श्रेष्ठ लगायत साहित्यकारपिसं नं सताब्दी पुरुष जोशी लुमंका: थ:पिनि साहित्य न्ह्यब्वयादीगु ख: ।
प्रा. डा. माणिकरत्न शाक्यं शताब्दी पुरुष पाखें अन २९ दँ न्ह्य:निसें ब्वंकेगु यानाच्वंगु पारमिता बारे न्ववानादीगु ख:।

लोक साहित्य परिषदया परिसरय् दुगु मायादेवी देयग: पलिस्था व लुम्बिनीया बोधि बृक्षयात तिस्यु कल्चर यानाहया: थुगु थासय् वंगल सिमा बोधि बृक्ष पिइगु ज्याय् भाजु एच.के. बिजय अवालेया योगदान बारे रिता महर्जनं च्वसू न्ह्यब्वयादीगु ख: ।
ज्याझ्वलय मिसा साहित्यकार दिव्या ताम्राकारं लसकुस अले बिमलप्रभा बज्राचार्यं ब्वति कयादीपिं सकसितं सुभाय् देछादीगु  ख: धा:सा  बिमला मानन्धरं ज्याझ्व: न्ह्याकादीगु ख: ।
ज्याझ्व: मुनाया नाय: अन्जना ताम्राकारया नाय:सुइ जूगु ख: ।