ललितपुरमा ज्येष्ठ नागरिक फोटो प्रदर्शनी

शकुन्तला राना मगर, काठमाडौं / राष्ट्रिय फोटो पत्रकार समूह र एजिङ नेपालको संयुक्त आयोजनामा ‘तस्वीरमा ज्येष्ठ नागरिक’ फोटो प्रदर्शनी सम्पन्न भएको छ । शनिबार ललितपुरको पाटन दरबार क्षेत्रमा प्रदर्शनी गरिएको थियो । प्रदर्शनीमा देशभरका ४० फोटो पत्रकारले खिचेका ६२ ओटा फोटो राखिएका थिए।
अन्तर्राष्ट्रिय ज्येष्ठ नागरिक दिवसको उपलक्ष्यमा गरिएको उक्त प्रदर्शनीमा हिमाल, पहाड र तराईका ज्येष्ठ नागरिकहरुको तस्वीर राखिएको थियो ।
प्रदर्शनीका क्रममा आयोजित औपचारिक कार्यक्रममा ललितपुर महानगरपालिकाका मेयर चिरीबाबु महर्जनले ललितपुर महानगरपालिकाले ज्येष्ठ नागरिकको सम्मानको सन्दर्भमा जाने बुझेसम्मको काम गरिरहेको भन्दै यस्तो कामलाई प्रभावकारी बनाउन सहकार्य गरेर अगाडि बढ्न तयार रहेको बताए ।
उनले राष्ट्रिय फोटो पत्रकार समूह र एजिङ नेपाललाई आगामी वर्ष पनि यस किसिमको कार्यक्रम गर्न आग्रह गर्दै कार्यक्रमका निम्ति ललितपुर महानगर पालिकासँग सहकार्य गर्न आग्रह पनि गरे ।
उनले प्रदर्शनीमा राखिएका तस्बीरहरु प्रसंशा गर्दै प्रदर्शनको सफलताको कामना गरे ।
कार्यक्रममा जेष्ठ नागरिकको दैनिकी, मिहिनेत, सफलता, पारिवारिक खुशी, संघर्ष तथा सफलता झल्कने तस्वीर प्रदर्शनीमा राखिएको आयोजकले बताए ।
फोटो प्रदर्शनीमा देशभरका ४० फोटो पत्रकारले खिचेका ६२ ओटा फोटो राखिएको कार्यक्रम संयोजक गणेश बिष्टले जानकारी दिए ।