संकटाद्वारा एपीएफ पराजित ,चौथो जितसँगै आर्मी शीर्ष स्थानमा

२४ पुस, काठमाडौं । संकटा क्लबले शहीद स्मारक ए डिभिजन लिगमा बिहीबार सशस्त्र प्रहरीको एपीएफ क्लबलाई ४-२ ले पराजित गरेको छ ।दशरथ रंगशालामा भएको खेलमा १९ औं मिनेटमा लक्ष्मण रुचालले करिब २५ यार्डबाट प्रहार गरेको प्रिकिक गोलबाट संकटाले अग्रता लिएको थियो । पेनाल्टी एरियामा वान बाउन्स भएर बल गोल भए पनि एपीएफका गोलकिपर अमृत चौधरीले रोक्ने कुनै मौका पाएनन् ।
४४ औं मिनेटमा कर्ण सुब्बाले गोल गर्दै संकटाको अग्रता दोब्बर पारे । पेनाल्टी एरियामा अजयी मार्टिन्स कोयोडोको पासमा कर्णलेको पहिलो प्रहार एपीएफका गोलकिपर अमृतले रोकेका थिए तर त्यसमै बएको रिबाण्डमा कर्णले नै गोल गरेका हुन् ।
५३ औं मिनेटमा अजयीले नै गोल गर्दै संकटालाई ३-० को अग्रता दिलाए । तर एपीएफले लगातार दुई गोल फर्काउँदै खेलमा फर्कने संकेत गरेको थियो । ५६ औं मिनेटमा नवीन लामा र ७२ औं मिनेटमा आशिष लामाले गोल गर्दै खेल ३-२ को स्थितिमा पुर्‍याए । तर ८८ औं मिनेटमा अजयी मार्टिन्सले नै गोल गर्दै संकटालाई ४-२ को अग्रता दिलाए ।
विभागीय टोली त्रिभुवन आर्मी सिजनमा पहिलो पटक शहीद स्मारक ए लिगको शीर्ष स्थानमा उक्लिएको छ । बिहीबार भएको खेलमा आर्मीले सरस्वती युथ क्लबलाई १–० गोल अन्तरले हराएको हो ।लिगमा आर्मीको यो चौथो जित हो । पाँचमध्ये चार खेल जितेको आर्मी १२ अंक जोड्दै शीर्ष स्थानमा उक्लिएको छ । मनाङ मर्स्याङ्दी ११ अंकका साथ दोस्रो स्थानमा छ ।त्रिपुरेश्वरस्थित दशरथ रंगशालामा भएको खेलमा सरस्वतीलाई पराजित गर्न आर्मीका जर्ज प्रिन्स कार्कीले निर्णायक गोल गरे । खेलको २९ औं मिनेटमा दिनेश हेन्जनले पेनाल्टी एरियामा दिएको क्रसमा जर्जले गोल गरेका हुन् । दोस्रो हाफमा पनि हार्मीले गोल गर्ने अवसर पाएको थियो तर सदुपयोग गर्न सकेन । ७४औं मिनेटमा सन्तोष तामाङको फ्रिकिकमा नवयुग श्रेष्ठले हानेको बल पोष्ट नजिकैबाट बाहिरियो । लगत्तै टंक बस्नेतले वान भर्सेस वानमा चुकेको थिए ।