भगवान शरण !!!

मथुरा साय्‌मि

पुलां बानेश्वरया चुक ।झ्वःलि झ्वःलिं पसः ।सलंसः मनू जुयाच्वनी , मदिक्क उलि हे गाडी नं । काललल् कुललल् सलं व गाडिया न्हायपं हे थ्वइगु सलं व बजार न्ह्याबलें ग्रस्त ।

सतकस्वःगु छेय् छहाकः जक खःसां दुने दुने छेखा छेखापतिं बालं च्वनाच्वंपिं गनगनयापिं मनूत दु । क्वथा गनं प्वंगु मदु । फोहोर अले उत्तिकं ।गुलिंगुलिंसिनं द्यः ख्युउलं फोहोर प्वःप्वःचिनाः लॅय् वाये हइ । नगर पालिकाया गाडि वयाः सुलि पुया हयेव छेयखा छेयखां मनूत हथासंपथासं गाडिइ फोहोर प्वंकः वइ ।गाडि पलख च्वनाः दक्वदाक्व फोहोर मुनायनी । छुं खॅ मदु ।

छाय् छाय् न्हियान्हिथं वइगु गाडि वयेगु दित । फोहोर लॅयसं थात ।स्वये हिसि मन्त ।गाडि च्यान्हु , झिन्हु, बाःछि बिकाः जक वयेगु यात । उलिया दुने लॅय् स्वये हे मजीक प्लाष्तिक प्वःप्वः , बोराबोरा फोहोरया पर्बः चिने थे जूवन । स्वःस्वःपिन्त , खंखंपिन्त सुख मन्त ।फोहोर व्यवस्थापन समितिं थःगु ज्या पूवंक छाय् याये मफयाच्वन । व जनता सकसिनं मसिया हे च्वन ।

मेपिन्त स्वयाः उप्वः मछिंगु अन उषायात हे जुवन । फोहोर वांछ्वये हैगु सतकया कुने हे वया पसः ।छगू सतर । तःक्यहेपिं जानाः चायेकूगु । झिलिमिलि बांबांलाःगु फेसन फेसनया वसः पसः । पसः दुने ला नस्वाः , पिने स्वयां स्वये हे मजिल । बाःछि बाःछि तक द्वॅचिना च्वनीगु फोहोरया दंगुरं मिखायात जक कथंकःगु मजुसे , न्हासय् नं ग्याॅस-आक्रमण जूवन ।अन जुइपिं मनूतसें न्हायप्वाः तिनाः जुल । गुलिं ला व लं मवसे मेखेरं फहिलाः वनेगु यात । घाःपाः उषायात बांमलाक लात ।वयाथाय् वइपिं गाहात छम्ह छम्ह यायां पाः जुल । पसःया बाः पुलेत हे वयात आसु आसु कन ।

छकः थः हे तःक्यहेपिं मुनाः छु याये गय् यायेया सहलह ब्याकल । पसः त्वःताछ्वय् नं मफुनि । सहः याना च्वनें गुलि च्वने । च्वने हे थाकुल ।

वया तताम्हं छगू स्यल्लाःगु प्रस्ताब हल । प्रस्ताब सकसितं यः ताल । व हे अनुसार उमिसं ज्या यात । धात्थें छन्हु शनिवाः उपिं सकलें जानाः द्यःया मूर्ति छगू हयाः अन पलिस्था यात । फि सिमेन्तं बल्लाक स्वनाः द्यः ल्ह्वने मफयेकल । अले स्वां सिन्हः तिकाः धुं च्याकाः छगूकथं पुजा हे यानाछ्वत ।

कन्हेखुन्हु धू वांछ्वःवःपिसं द्यःयाथाय् मतसे उखेथुखे तयावन । द्यःयाथाय् म्हिगः म्हीग थे फोहोर द्वॅ मचिन । उषायात मन हे सिचुसेच्वन । याउॅक सासः ल्हात । बल्ल खःगु लॅ-पु छपु ध्वदुल । द्यः धयाम्ह दयेमा मदयेमा तर मनूया नुगः नुगलय् द्यः दुगु हे जुयाच्वन । नेपालय् थ्व हे विश्वास व आस्थां ज्या याइगु जुयाच्वन । धन्य परमेश्वर । वया मनय् चितासू लुल । आः पंग-पिंगः छुं मन्त । याउॅल । वया चच्छिं छन्ह्यः जुइक चान्हय् न्ह्यःवल ।

कन्हेखुन्हु । सुथसिया गुताः क्यनेवं व न्हापालिपा थे पसः चायेकः वन । पसः न्ह्यःने थ्यनेव व किंकर्तब्यबिमूढ जुल । वाताहाॅ च्वन । अन ला धू-प्वः व फोहोरं द्यःया ख्वाः हे खने मदयाच्वन ।दंम्ह मनू दनां तुं जुल । न वं धू चीकाछ्वये फत ,न पसः हे चायेके फत !!!!!