सुवर्ण शाक्यया न्हूगु सफू ग्वलाखँ पिदन

येँ, कौलागा चतुर्दशी । दँय्दसं धयाथें न्हून्हूगु सफू पिथनाः नेपालभाषा साहित्य ख्यः जायेका च्वनादीम्ह च्वमि सुवर्ण शाक्यया न्हूगु सफू ग्वलाखँ थौं छगू ज्याझ्वलय् विमोचन जुल ।
सफूया विमोचन थुगुसीया न्हूदँ समारोह समितिया नायः रमेश महर्जनं यानादिल ।
ज्याझ्वलय् नवासें नेपालभाषाया च्वज्या न्ह्यानाच्वंगुलिइ लसता प्वंकादिलसा उकियालिसें नेवाःभाय्या विकासया लागि दक्व मुनाः न्ह्याज्यायेत नं वय्कलं सुझाव बियादिल । लिसें वयाच्वंगु कछला पारुकुन्हू क्यनीगु न्हूदँ ११४०यात लसकुस यायेत व सकसितं भिंतुना इनेत बसन्तपुलिं न्ह्या्रइगु सांस्कृतिर रयालिइ ब्वतिकायेत नं सकसितं इनाप यानादिल ।
नेपालभाषा मंकाः खलःया न्वकू मल्ल के सुन्दरं नेवाःतय्गु जातीय पहिचान व संस्कृतियात म्वाकातयेत व ल्यंकातयेत सकसिनं थःथःगु ख्यलं फूचाःगु ज्या यानाः हे वनेमाःगु व थथे हे यानाः नेवाः एकता स्यंकेत स्वयाच्वंपिं कुतत्वतयत परास्त यायेमाःगु खँय् बःबियादिल ।
सफूया बारे नवासें सरस्वती तुलाधरं विशेष यानाः नेवाःतय्गु धर्म व संस्कृति खनेदयेक वःगु अतिक्रमणयात चिरफार यानाः नेवाःतयगु मौलिकता क्यनेगु ज्याय् च्वमि शाक्यं यक्व मिहेनत याःगु खँ कनादिल । वय्कलं व सफुतिइ बुद्ध धर्म, येँयाः, मोहनि, म्हपुजा, स्वन्ति, गुरुपुन्हि, गुंला व शाक्यपिनिगु विषयय् लेख दुथ्यानाच्वंगु नं धयादिल ।
च्वमिं ई व परिस्थितिं यानाः नेवाःतय्गु थःगु मौलिक धर्म, संस्कृति व नखः चखलय् यक्व हिउपाः वयेधुंकूगु व यक्व अतिक्रमण व प्रदुषणय् लानाः आः छु मौलिक खः छु मौलिक मखु धइगु हे तिफ्याये थाकूगु अवस्था वःगुलिं छुं च्वयेमाःगु वाध्यता सिर्जना जूगु खँ कनादिल ।
प्रकाशक संस्था ओलम्पक क्लबया अध्यक्ष व ज्याझ्वःया सभापतिं नेवाः भाय् व साहित्यया सिर्जना व संरक्षण यायेत दक्व नेवाःत न्ह्यःने वयेमाःगु खँ कनादिल ।
सफू ओलम्पसं प्रकाशन याःगु खःसा थुकिया आर्थिक भार व छपाइका भाला तोषण शाक्यं कयाबिउगु खः ।
courtesy : jheegu.com