रास्वपा काठमाडौं जिल्ला समितिको पूर्ण बैठक, संगठन विभाग प्रमुखमा बस्नेत, कोषाध्यक्षमा रैला मनोनीत

जिल्ला कोषाध्यक्षमा केदारप्रसाद रैला मनोनीत, संगठन विभाग प्रमुखको जिम्मेवारी सौरभ बस्नेतलाई

काठमाडौं । राष्ट्रिय स्वतन्त्र पार्टी (रास्वपा) काठमाडौं जिल्ला समितिको पूर्ण बैठक सम्पन्न भएको छ। २०८३ असोज १८ गते आइतबार काठमाडौं महानगरपालिका–८, गुह्येश्वरीस्थित गुह्येश्वरी क्याटरिङमा जिल्ला सभापति राजा शाक्यको अध्यक्षतामा बैठक बसेको हो।

बैठकमा काठमाडौं जिल्ला समितिका पदाधिकारी तथा सदस्यहरू, जिल्लाअन्तर्गतका नगर सभापति, क्षेत्रीय संयोजक तथा ‘घन्टी मित्र’हरूको उल्लेखनीय सहभागिता रहेको रास्वपा काठमाडौं जिल्ला समितिले जनाएको छ।

बैठकमा पार्टीको संगठनात्मक गतिविधि, आगामी राजनीतिक कार्यदिशा तथा स्थानीय र प्रदेश तहको निर्वाचन तयारीबारे छलफल भएको थियो। साथै पार्टीका विभिन्न तहबीचको आपसी समन्वय र सहकार्यलाई प्रभावकारी बनाउने तथा समसामयिक राजनीतिक विषयमा समेत छलफल गरिएको थियो।

बैठकले जिल्ला समितिको जिम्मेवारीसमेत हेरफेर गरेको छ। जिल्ला समितिका सदस्य केदारप्रसाद रैलालाई काठमाडौं जिल्ला समितिको कोषाध्यक्ष पदमा मनोनयन गरिएको छ। जिल्ला सभापति राजा शाक्यले रैलालाई कोषाध्यक्षको जिम्मेवारी दिएका हुन्।

त्यसैगरी सौरभ बस्नेतलाई काठमाडौं जिल्ला समितिको संगठन विभाग प्रमुखको जिम्मेवारी दिइएको छ।

बैठकमा आगामी दिनमा संगठनलाई थप व्यवस्थित र प्रभावकारी बनाउँदै स्थानीय तहसम्म पार्टीका गतिविधि विस्तार गर्ने विषयमा समेत छलफल भएको जनाइएको छ।

रास्वपा काठमाडौं जिल्ला समितिले निर्वाचनलाई लक्षित गर्दै संगठन विस्तार, कार्यकर्ता परिचालन तथा विभिन्न तहका समितिबीच समन्वयलाई प्राथमिकतामा राखेर अघि बढ्ने जनाएको छ।