राष्ट्रिय झण्डा ओढाएर जनकवि दुर्गालाल श्रेष्ठको राजकीय सम्मानका साथ अन्त्येष्टि

काठमाडौँ/जनकवि दुर्गालाल श्रेष्ठको पार्थिव शरीरमा नेपालको राष्ट्रिय झण्डा ओढाएर राजकीय सम्मानका साथ काठमाडौँको परम्परागत श्मशान घाट कर्णदीप (करबीर श्मशान) मा अन्त्येष्टि गरिएको छ।

अन्त्येष्टिका क्रममा नेपाल सरकारका तर्फबाट ऊर्जा, जलस्रोत तथा सिँचाइ मन्त्री विराजभक्त श्रेष्ठ, गृहमन्त्री सुदन गुरुङ तथा काठमाडौँ महानगरपालिकाकी कार्यवाहक प्रमुख (का.बा. मेयर) सुनिता डङ्गोलले संयुक्त रूपमा दिवङ्गत जनकविको पार्थिव शरीरमा राष्ट्रिय ध्वज ओढाएर राजकीय सम्मान प्रकट गर्नुभएको थियो।

यसअघि उहाँको पार्थिव शरीरलाई बिहान ११ बजेदेखि अन्तिम श्रद्धाञ्जलीका लागि नेपाल भाषा मंकाः खलः को प्राङ्गणमा राखिएको थियो। त्यहाँ वरिष्ठ कलाकारहरू मदनकृष्ण श्रेष्ठ, हरिवंश आचार्य लगायत विभिन्न क्षेत्रका प्रतिष्ठित व्यक्तित्व तथा सर्वसाधारणले श्रद्धाञ्जली अर्पण गरेका थिए।

श्रद्धाञ्जली पछि बागमती प्रदेशका मन्त्री  शैलेन्द्र बज्राचार्य,संघिय सांसद कुलभक्त शाक्य,  काठमाडौँ महानगरकी का.बा. मेयर सुनिता डङ्गोलसहित हजारौँ नगरवासीको उपस्थितिमा विशाल शवयात्रा निकालिएको थियो। नगर परिक्रमा गराउँदै भावविह्वल वातावरणमा पार्थिव शरीरलाई करबीर श्मशान पुर्‍याइएको थियो।

अन्त्येष्टिका क्रममा लामाहरूबाट पाठ, भिक्षुहरूबाट परित्राण पाठ तथा बज्राचार्य गुरुजुहरूबाट दुर्गतिपरिशोधन पाठ गरी धार्मिक विधिपूर्वक अन्त्येष्टि गरिएको थियो। करबीर श्मशानमा श्रद्धान्जली दिन पुगेका रास्वपा काठमाडौँ जिल्ला सभापति राजा शाक्य सामूहिक ‘दुर्गतिपरिशोधन पाठ’ मा  सहभागी हुनुभएको थियो।

Bhoto : Bikram

उहाँको पार्थिव शरीरमा उहाँका जेष्ठ सुपुत्र सुमन श्रेष्ठले दागबत्ती दिएका थिए ।

अन्तिम संस्कारका क्रममा विभिन्न राजनीतिक दलका नेता, साहित्यकार, संस्कृतिविद्, सङ्घ-संस्थाका प्रतिनिधि एवं सर्वसाधारणको ठूलो उपस्थिति रहेको थियो।

[photo: Manaoj]