असन दबलीमा रामशेखर नकर्मीको ‘१२ बजे’ र ‘क्षरावति द्यो’ नाटक प्रदर्शन

काठमाडौं । नेवार समुदायको मौलिक कला, संस्कृति तथा परम्परागत दबू प्याखँको संरक्षण र नयाँ पुस्तामा हस्तान्तरण गर्ने उद्देश्यले काठमाडौं महानगरपालिका वडा नं. २७ को आयोजनामा असनको दबलीमा परम्परागत दबू प्याखँ(नाटक) प्रदर्शन गरिएको छ।

नाट्यकर्मी समाज नेपाल, भक्तपुरका कलाकारहरूले भक्तपुरका स्वर्गीय रामशेखर नकर्मीले लेख्नुभएको ‘१२ बजे’ र ‘क्षरावति द्यो’ नामक नाटक प्रदर्शन गरेका हुन्।

नेवार समुदायमा परम्परागत रूपमा टोलटोलमा दबली निर्माण गरी विभिन्न नाटक तथा सांस्कृतिक प्याखँ प्रदर्शन गर्ने चलन रहँदै आएको छ। आधुनिक मनोरञ्जनका माध्यमहरूको विस्तारसँगै ओझेलमा पर्दै गएको यस मौलिक नाट्य परम्परालाई जीवन्त राख्ने र नयाँ पुस्तालाई दबू प्याखँबारे जानकारी गराउने उद्देश्यले कार्यक्रम आयोजना गरिएको हो।

कार्यक्रममा नाट्यकर्मी समाज नेपाल, भक्तपुरका कलाकारहरूले परम्परागत नाट्यशैलीमार्फत नाटक प्रस्तुत गरेका थिए। स्थानीय कला, भाषा, संस्कृति र सामाजिक जीवनसँग जोडिएको दबू प्याखँले नेवार समुदायको सांस्कृतिक पहिचानलाई उजागर गर्नुका साथै पुस्तान्तरणमा समेत महत्वपूर्ण भूमिका खेल्दै आएको छ।

काठमाडौं महानगरपालिका वडा नं. २७ को आयोजनामा भएको यस कार्यक्रमले परम्परागत दबू प्याखँको संरक्षण, प्रवर्द्धन र निरन्तरतामा योगदान पुर्‍याउने अपेक्षा गरिएको छ।