नेवाः हना सिरपाः दिपक तुलाधरयात ल:ल्हात

यें/ सक्वया भाषा साहित्य मुँज्या खलःपाखें दँय्‌दसं बीगु याना वयाच्वंगु “नेवाः हना सिरपाः ‘थुगुसी मातृभाषा शिक्षा’या अभियन्ता दिपक तुलाधरयात ब्यूगु दु ।उगु खलःया ग्वसालय् शनिबा: सक्वया समाइरा गार्डेनय् नेपाल भाषा एकेडेमीया चान्सलर मल्ल के. सुन्दरया मू पाहाँसुइ जूगु ज्याझ्वलय् ५०द्व: तका:या दां(नगद)सहितया थुगु सिरपा ल:ल्हायेगु ज्या जूगु ख: ।
थगुने नेपालभाषाया स्वम्ह वरिष्ठ साहित्यकारपिं मथुरा सामि, डा. योगेन्द्र प्रधान व नर्मदेश्वर प्रधानयात थ्व सिरपाः लःल्हाः गु खः।
नेवाः भासं आखः ब्वंकीगु निजी स्कुल चायेकादीम्ह दिपक तुलाधरं नेवाःतय् हरेक बस्तीइ नेवाः स्कुल चायेकेगु लागिं ‘नेवाः बस्ती नेवाः स्कुल’ अभियान कथं स्वनिगःया थीथी लागाय् नेवाः भासं ब्वंकीगु स्कुल चायेकेगु ज्या यानादीगु खः । लिसें वय्‌कलं स्वनिगःया आपालं निजी स्कुलय् वनाः नेपालभाषा छगू विषय नं ब्वंकेत इनाप यासें भाषा विषय ब्वंकेत उत्प्रेरित नं यानादीगु खः ।वय‌्‌कःया थुकथंया ज्व:मदुगु याेगदानया कदर यासें “नेवाः हना सिरपाः”या नीति ल्य:गु ख:।
उगु ज्याझ्वलय् ज्ञान बहादुर श्रेष्ठं भाय्हिला दीगु सफू “मचाम्ह: राजकुमार” चिकी फ्येना (विमाेचन) ज्या नं जूगु ख:।