गथांमुगः (चि बाखं )

छगू सुलिमय् राम व स्याम निम्ह पासापिं थःपिंत सूर ततं दुबिस्ता ब्याकाच्वन।भचा भचा क्वाहांवंसां इपिं सूरय् धाःसा मलानि।रामं

खँ छुत–“स्व स्याम,थौं व हारांचित झीसं भक्कुमार जुइक जुक्के मानि खँला।”थौंने वं हे खः जितः वा त्वधुइक दा:गु ।” थःगु म्हुतुसि फहिका निपु वा मदुगु वाकुधी केना: स्यामयात धाल–“जिगु निपु वा त्वथुला बिउगुया पलेसा थौं वयागु प्यपु वा कुतुंवयेक वयात ख्वालय् कि ख्वालय् मुक्का नक्केगु का।सुरेजु,खँला।”

स्यामं पासायागु वाकुधी छक: क्वथीक स्वयाः वा न्हेया: ल्हाः म्हूचिना: पासायात धाल–“राम,छं धन्दा हे कायेमाःगु मदु।थौं व हारांचिगु सातु वनाः चिकुज्वर वइगु जुल का हा हा हा……”

गथां मुगः सालाहल।गथांमुगःया लिउ लिउ न्ह्यो न्ह्यो जात्रा स्वःवःपिं म्व:म्व:।राम व स्याम लँया सिथय् छगः देगःया फलय् गयाः हारांचित मालेत मिखा चा:हीकाच्वन।इमिसं खन गथांमुगः जात्राय् न्हापा न्हापा थें न्ह्योनेलाःथे म्हुतु वानाः,लाक्व पाक्व हालाः तिं तिं न्हुयाः सनाव:पिं मनूत नं मदु ।गथांमुगः यानाहःम्ह मनूया म्हय् नं स्वये हे मछालापुगु लाःलाःथे च्वयात:गु नं मदु।गथांमुगःया लिउ लिउ न्ह्यो न्ह्यो जात्राय् वःपिं मनूत जुलूसय् वःपिथ थें ” ओँम शान्ति जय नेपाल” या सः थ्वयेका: न्ह्याःवयाच्वंगु दु।गथांमुगः जात्राया थ्व लु खनाः राम स्याम निम्हं अजूचाल।

कँग्रेस धकाः 2006 सालय् ज्वनाः कुनातंपिं 2007 सालय् त्वःताहपिं थौं गथांमुगः जात्राय् “ओँम शान्ति जय नेपाल” सः तया: हःपा: बियावःपिनिगु दथुइ निम्ह प्यम्ह राम व स्यामं म्ह स्यूपिं हे जुयाच्वन।इमित त्वःताह:गु नं थ्व हे गथांमुग: निला प्यला न्हयो जक खः।न्हापा इपिं गथां मुगःया जात्राय् दँय् दँसं सिं सिं धायेका थःथवे ल्वापु थलाःल्वानाजुइपिनिगु हुल्याःतयेगु नां धलखय् नां दुथ्याःपिं खः।इपिं अथे शान्त जुयाः थौं गथांमुगः जात्राय् वयाच्वंगु खनाः राम व स्याम झन हे अजूचाल।थुगसिया गथांमुगःया जात्राय् इमिगु मती हे मदुगु लु इमिसं खन।हारांचित मालाच्वंगु इमिगु मिखां त्वलय् जुयाः गथांमुगः जात्रा स्वयाच्वन।अन हूलय् इमिसं हारांचित मखन। मालेगु कुतः नं मयात।