रास्वपा काठमाडौं जिल्ला समितिले विपद् व्यवस्थापनका लागि उपसमिति गठन

काठमाडौं /राष्ट्रिय स्वतन्त्र पार्टी (रास्वपा) काठमाडौं जिल्ला समितिले विपद्को समयमा उद्धार, राहत तथा आवश्यक सहयोगलाई प्रभावकारी बनाउन विभिन्न उपसमिति गठन गरेको छ।

काठमाडौं जिल्ला समितिको आकस्मिक बैठकबाट वर्तमान आपतकालीन अवस्थालाई मध्यनजर गर्दै पदाधिकारी तथा सदस्यहरूलाई विभिन्न जिम्मेवारीसहित उपसमितिमा विभाजन गरिएको जिल्ला समितिले जनाएको छ।

समितिले अर्थ व्यवस्थापन, ब्लड व्यवस्थापन, राहत व्यवस्थापन तथा उद्धार एवं स्वयंसेवक परिचालन लगायतका क्षेत्रमा छुट्टाछुट्टै उपसमिति गठन गरेको छ। यी उपसमितिहरूले विपद्का बेला आवश्यक उद्धार, राहत, रक्त व्यवस्थापन तथा आर्थिक स्रोत परिचालनमा समन्वय र सहजीकरण गर्नेछन्।

जिल्ला समितिका अनुसार उपसमितिको कार्यलाई थप प्रभावकारी र व्यवस्थित बनाउन सम्बन्धित संयोजकले आवश्यकताअनुसार थप साथीहरूलाई उपसमितिमा सदस्यका रूपमा जोड्न सक्नेछन्।

विपद्को संवेदनशील अवस्थामा सम्बन्धित उपसमितिका संयोजक तथा सदस्यहरूले आफ्नो जिम्मेवारीलाई उच्च प्राथमिकताका साथ प्रभावकारी रूपमा निर्वाह गर्न जिल्ला समितिले आग्रह गरेको छ। साथै काठमाडौं जिल्ला समितिका सम्पूर्ण पदाधिकारी तथा सदस्यहरूलाई आवश्यक सहयोग, समन्वय र सहकार्य गर्न अनुरोध गरिएको छ।

चार प्रमुख उपसमिति

१. अर्थ व्यवस्थापन उपसमिति
संयोजक: सुमन कार्की

२. ब्लड व्यवस्थापन उपसमिति
संयोजक: सौरभ बस्नेत

३. राहत व्यवस्थापन उपसमिति
संयोजक: मुना कार्की

४. उद्धार एवं स्वयंसेवक उपसमिति
संयोजक: केदार प्रसाद शैल

रास्वपा काठमाडौं जिल्ला समितिले विपद्को समयमा पार्टी संरचनालाई मानवीय सहयोग र उद्धार कार्यमा परिचालन गर्ने उद्देश्यले उक्त संयन्त्र तयार गरेको जनाएको छ।

“विपद्को समयमा राजनीति होइन, मानवीय सेवा र सहयोग पहिलो प्राथमिकता हुनुपर्छ” भन्ने भावनासहित संयन्त्रलाई सक्रिय बनाउने तयारी गरिएको छ।