ब्रोड पिक’ दुर्घटनामा दिवंगत निर्मल पुर्जासहितका आरोहीहरूप्रति प्रम बालेन शाहद्वारा श्रद्धाञ्जली अर्पण

काठमाडौँ। विश्वको १२औँ अग्लो हिमाल ‘ब्रोड पिक’ आरोहणका क्रममा ज्यान गुमाएका विश्व कीर्तिमानधारी पर्वतारोही निर्मल पुर्जा (निम्स दाइ) सहित अन्य आरोहीहरूप्रति प्रम बालेन शाहले भावपूर्ण श्रद्धाञ्जली व्यक्त गरेका छन्।

सामाजिक सञ्जालमार्फत शोक सन्देश जारी गर्दै मेयर शाहले दिवंगत आरोहीहरूप्रति श्रद्धाञ्जली तथा शोकसन्तप्त परिवारजनप्रति हार्दिक समवेदना प्रकट गरेका हुन्।

आरोहणको महत्त्व र जोखिमलाई जोड दिँदै उनले लेखेका छन्, “आरोहण केवल शिखर चुम्ने यात्रा होइन। यो साहस, अनुशासन, त्याग र मानवीय सीमालाई चुनौती दिने अदम्य आत्मविश्वासको सर्वोच्च अभिव्यक्ति हो। हिमालले धेरैलाई शिखरको गौरव दिन्छ, कहिलेकाहीँ आफ्नै काखमा सधैँका लागि अँगालेर पनि राख्छ। तर, हिमाल आरोहीहरू आफ्नो साहस र समर्पणका कारण इतिहासमा सधैँ अमर रहन्छन्।”

पाकिस्तानको काराकोरम पर्वत शृङ्खलामा अवस्थित ८,०५१ मिटर अग्लो ब्रोड पिकमा निर्मल पुर्जासहित छ जना नेपाली र चार जना विदेशी आरोहीहरूको दुःखद निधन भएको हो।

उक्त घटनाले स्तब्ध बनाएको उल्लेख गर्दै बालेनले थप लेखेका छन्, “निर्मल पुर्जा लगायत सम्पूर्ण दिवङ्गत आरोहीहरूको भौतिक यात्रा मात्रै रोकिएको हो, तर उहाँहरूको साहस, समर्पण र योगदानको इतिहास सधैँ प्रेरणायुक्त र जीवित रहिरहनेछ।”

विश्व पर्वतारोहण क्षेत्रमा नयाँ कीर्तिमान कायम गरी नेपाललाई अन्तर्राष्ट्रिय जगतमा चिनाउन सफल पुर्जा लगायतका आरोहीहरूको निधनले सिङ्गो देश र पर्वतारोहण क्षेत्रमा अपूरणीय क्षति पुगेको छ।