थनिनिसें फिल्म साउथ एसिया महोत्सव

यलया यलमाया केन्द्रय् प्यन्हूयंकं न्ह्याइगु महोत्सवय् थी थी देय्या ४७ गू लघु चलचित्र व वृत्तचित्र क्यनीगु जुइ । महोत्सवय् नेपाःलिसें भारत, पाकिस्तान, बङ्गलादेश, श्रीलङ्कानापं गुंगू देय्या संकिपा क्यनेत्यंगु दु ।

महोत्सवया सहायक निर्देशक पवस मानन्धरं थुगुसि वेस्ट फिल्म इन द क्लाइमेट क्राइसिस सिरपाः थपेयानागु न्ह्यथंसें उत्कृष्ट चलचित्र, जुरी अवार्ड, उत्कृष्ट स्टुडेन्ट चलचित्र, उत्कृष्ट डेब्यु चलचित्र व उत्कृष्ट फिल्म इन द क्लाइमेट क्राइसिस अवार्डया निंतिं धेँधेँबल्ला जुइगु धयादीगु दु ।

“महोत्सव सुथय् ९ ताः ईनिसें न्ह्याइ । निर्देशनया बारे कार्यशाला नं जुइत्यंगु दु”, वय्कलं धयादिल, “वृत्तचित्र स्वयेत व दयेकीगु इच्छा दूपिनिया निंतिं थ्व महोत्सव छगू बाँलागु ह्वताः खः ।”

कार्यशालय् भारतया संकिपा निर्देशक कवीर खानं वइगु खँ दु । महोत्सवय् न्हापांगू न्हि स्वंगू हलय् ब्वनामिंपिंसं दयेकूगु स्वंगू लघु संकिपा क्यनीगु खँ दु ।

-राष्ट्रिय समाचार समिति, (रासस)