नेपाल भासा चिबाखं साहित्य पुच: ५ दँ क्यन

नेपाल भाषा चिबाखं पौ (स्मारिका) विमोचन व सहलह मुंज्या

ने. स.११४४ दिल्लागा: चह्रे (श्रावण १९, सनिवा: ),यल/  नेपालभाषा चिबाखं साहित्य प्यदँ फुना न्यादँ क्यंगु लसताय् नेपाल भाषा चिबाखं पौ (स्मारिका ) सफू  विमोचन व सहलह मुंज्या जूगु दु ।
यलया लोक साहित्य परिषद भवनया हलय् जूगु ज्याझ्वलय् नेपालभाषा चिबाखं साहित्य पुच:या दुज:पिं नरेश अमात्य, केदार सितु, रिता महर्जन,सुरेन्द्र लाल भुजु , दिब्या बज्राचार्यलिसें वरिष्ठ साहित्यकार ध्रुब मधिकर्मिपिस्ं सयुक्त रुपं स्मारिका बिमोचन यानादीगु ख: । ज्याझ्वलय् लसकुस न्वचू बिसें नेपाल भाषा चिबाखँ साहित्य पुच:या संयोजक नरेश अमात्यं कोरोनाया इलय् नेपा: जक मखु विश्वयात हे छगूक्थं कुनाब्युगु अवस्थाय् जन्म जूगु थ्व पुच: ५ दँ क्यंगु लसताय् सहलह मुँज्या न्ह्याकाच्वनागु खँ कनादिल । लिसें थुगु पुचलं याना: न्हूपिं चिबाखंमित जन्म जूगु लिसें पुलांपिन्त नं हानं च्वयेत ह:पा: बीगु ज्या या:गु धयादिल । वरिष्ठ साहित्यकार ध्रुब मधिकर्मीं चिबाखं साहित्य च्वयेत अध्ययन यायेमा:गु अले चिबाखनय् स्तरीयता हयेफैगु खँ कनादिल। लिसें गुकथं च्वैपिन्त ह:पा बिइ फइ धैगु खँ न्ह्यब्वसें । चिबाखं च्वच्वं वनेबलय् उकिया स्तर नं बिचा: यानावनेमा:गु खँ धयादिल । लिसें विमोचित ख्वा:पौयात कया: नं नुग: खँ तयादिल । मेम्ह साहित्यकार केदार सितुं चिबाखँ धैगु सिमित मापदण्ड कया च्वयेगु साहित्य मखु स्वतन्त्र रुपं न्ह्यब्वयेगु साहित्य ख: धासें थुगु साहित्ययात गुकथं न्ह्याकूसा बांलाइ धैगु खँ तयादिल। ज्याझ्वलय् ब्वतिकयादीपिं चिबाखंमिपिसथथ:गु सल्लाह व नुग: खँ तयेगु नं ज्या जूगु ख: ।ज्याझ्वलय् वरिष्ठ समालोचक डा. पुष्पराज राजकर्णिकार, शाक्य सुरेनं, माणिक उराय , तुयू पुं, महर्जन रत्नं नं थथ:गु नुग: खँ । तयादीगु ख:। चिबाखंयात समयसापेक्ष जुइक चिसंकिपाया रुपय् पिथनेमा:गु खँ नं अन ल्ह्वने ज्या जूगु ख: । ज्याझ्व:या भिडियो  लिंक :  https://www.facebook.com/share/v/8SsL2wbXWyV8tZcj/?mibextid=oFDknk
फोटो फिचर :