नेवाः नुगः

मथुरा साय्‌मि

स्वाहाने सुं छम्ह वयाः त्वाक् त्वाक् यात । अंगः बःकाकां स्वःवना । छम्ह म्हस्यूम्ह पासा। भाषा
ख्यलय् नांजाःम्ह छम्ह साहित्यकार । छम्ह नेवाः ।

निम्हं खॅ ल्हाल्हां बैठक क्वथाय् दुस्वया । थुचुथुचुं फ्यतुना । निम्हसिनं फिल्टरय् च्वंगु लः भचा भचा कपय् कया । म्हुतु प्याकुप्याकुं म्हं फु मफुया खॅ ब्याका ।

वं जिके जिगु थौकन्हेया गतिविधिया खॅ न्यन । पतिंचात बांलाक मसंसां ,फु मजूसां लेख च्वयेगु ज्यायात निरन्तरता बियाच्वनागु व सामाजिक संजालय् उकियात पित ब्वयाच्वनागु खॅ नं कना ।
जिगु खॅ न्यन्यं वं धयाहल ,” थ्व खॅय् ला छितः न्ह्याक्व च्वछाःसां म्हो हे जुइ । मस्यूगु सुनानं मदु । ”
जिगु थःगु खॅ ल्हाये धाःसा जिं नं भाषाया उत्थानया लागी सना हे च्वनागु दु । सकसिनं सिउ । जिगु छेयया सकलें सन्तानयाके नं नेवाः नुगः हे दु । नेवाः संस्कार दु । झी नेवाःतसें हे थःगु भाषा व
जातिय अस्तित्वयात थकायेत वास्ता मतःसा मेपिसं सुनां तःवै । न खॅयत न्ह्यचिली , न सॅयत । जिगु खॅ ला थुलिं । का, खःकि मखु ? ”

थुगु हे इलय् पासाया म्हिचाय् च्वंगु मोबाइल तिररर न्यात । वं लिकयाः खॅ फल । म्ह्यायम्ह जुयाच्वन । वया तिक्खरगु सः मोबाइलय् थ्वयावल , ” बाः । तपाईं कां हुनुहुन्छ ? ह्यां फ्रीज बनाउने मिस्त्री आइरा छ । पर्खिरा छ । के भन्ने? ”

मोबाइल दुछ्वयाः पासां जिगु ख्वाः छकः मस्वया थें स्वत । जिं नं मखंछु यानाः मस्यूछु यानाः क्वछुना बिया !!!