काठमाडौं उपत्यकामा १,०३८ जनामा सङ्क्रमणको पुष्टि, देशभर १४४२ संक्रमित थपिए

काठमाडौं / काठमाडौं उपत्यकामा आज १,०३८ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयले कोभिड–१९ सम्बन्धी विवरण अद्यावधिक गर्दै काठमाडौं उपत्यकाका तीन जिल्लामा ४०३ महिला र ६३८ जना पुरुषमा सङ्क्रमणको पुष्टि भएको जनाएको छ । पछिल्लो चौबीस घण्टामा देशैभरि ६,७३१ जनाको पीसीआर परीक्षण गरिएकोमा १,४४२ मा सङ्क्रमणको पुष्टि भएको छ । पछिल्लो चौबीस घण्टामा ३,५३८ जना संक्रमित निको भएर घर फर्केको जनाएको छ ।
मन्त्रालयका अनुसार उपत्यका अन्तगर्त काठमाडौंमा हाल १२, ५७२ जना, ललितपुरमा २,०५६ र भक्तपुरमा १,०६२ जनामा सङ्क्रमण सक्रिय छ । काठमाडौंमा हालसम्म ३०७, ललितपुरमा ८८ र भक्तपुरमा ८० जना गरी काठमाडौं उपत्यकामा हालसम्म ४७५ जना संक्रमितको मृत्यु भएको मन्त्रालयले उल्लेख गरेको छ ।