“आधुनिक काव्य व विद्रोहया सः” विमोचित:

काठमाडौं, २०८२ मंसिर ८, शनिबार (नेसं ११४६)/ नेपालभाषा साहित्यमा कविताको इतिहास र वर्तमानलाई गहिरिएर नियाल्ने उद्देश्यका साथ आज “कविताया लायकू” (The Poetry Society) को आयोजनामा डा. ज्योति तुलाधरको महत्त्वपूर्ण कृति “आधुनिक काव्य व विद्रोहया सः” (आधुनिक कवितामा विद्रोहको आवाज) को  विमोचन तथा समीक्षा कार्यक्रम सम्पन्न भएको छ।
कविताया लायकूकी अध्यक्ष एवं पुस्तककी लेखिका डा. ज्योति तुलाधरको अध्यक्षतामा पाटन संग्रहालय चोकमा भएको कार्यक्रममा नेपाल भाषा एकेडेमीका चान्सलर वरिष्ठ साहित्यकार मल्ल के. सुन्दरको प्रमुख आतिथ्यमा भएको थियो।
आज विमोचन भएको “आधुनिक काव्य व विद्रोहया सः”मा  दस आधुनिक कविका विद्रोह चेत भएका कविताहरूको समालोचना गरिएको छ। यसमा नेपाल भाषाको आधुनिक साहित्यको गहिरो अध्ययन प्रस्तुत गरिएको छ।
विमोचन कार्यक्रममा प्रा. डा. प्रेमशान्ति तुलाधरले पुस्तकको समीक्षा गर्दै पुस्तकका समालोचनाका विभिन्न विधिहरु अपनाइएको र यसमा नेपालभाषाको कविताको एक शैलीमा मात्र समालोचना केन्द्रित भएको त्यो पनि विद्रोहको आवाजमा केन्द्रित भएको बताए । उहाँले डा. तुलाधरको यो कृतिले नेपाल भाषाका आधुनिक कविताको वैचारिक र विद्रोही आयामलाई वैज्ञानिक ढंगले विश्लेषण गरेको बताए।
यसभन्दा अगाडि प्रतिष्ठित उपन्यासकार तथा भाषासेवी मल्ल के. सुन्दर, समालोचक प्रधान ,वरिष्ठ साहित्यकार(समालोचक)प्रा.नर्मदेश्वर प्रधान ,हितकरबीर सिंह कंसाकार, भाषा आयोगका सदस्य कवि सुरेश किरण , कवि रजनीमिलाद्वारा संयुक्त रूपमा पुस्तकको विमोचन गरिएको थियो।
प्रमुख अतिथि मल्ल के. सुन्दर ले आफ्नो मन्तव्यका क्रममा नेपाल भाषा साहित्यको इतिहास कोट्याउँदै डा. तुलाधरको गहन अध्ययनलाई प्रशंसा गर्दै आधुनिक कवितामा विद्रोहको भूमिका र समाज रूपान्तरणमा यसको अपरिहार्यतामा जोड दिए।
कविता लाय्कूका सचिव समेत रहेका कवि रजनिमिलाले कवितामा विद्रोहको आवाज , त्यसले समाजलाई दिने सन्देश र कविहरूले भोगेको चुनौतीका बारेमा आफ्नो मन्तव्य राख्दै डा.ज्योति तुलाधरको कार्यको प्रशंसा गरे ।
कार्यक्रममा कविता वाचन को सत्र पनि राखिएको थियो, जहाँ वरिष्ठ कवि योगेन्द्र प्रधानांग, रजनीमिला, सुरेशकिरण लगायतले विद्रोह र सामाजिक चेतना झल्काउने कविताहरू वाचन गरेका थिए।
कार्यक्रमको अन्त्यमा सभाध्यक्ष तथा लेखक डा. ज्योति तुलाधरले मन्तव्य दिँदै नेपाल भाषाको साहित्य निकै धनी रहेको बताए । उनले आधुनिक कवितालाई केवल कल्पनाको उपजका रूपमा नभई सामाजिक, राजनीतिक र सांस्कृतिक विद्रोहको बलियो हतियारको रूपमा चित्रण गर्न खोजिएको बताए। उनले सहभागी सबैलाई धन्यवाद ज्ञापन गर्दै कार्यक्रमको समापन गरे।
कार्यक्रमका मुख्य अंश:
पुस्तकको विशेषता: दस आधुनिक कविका कविताहरूको गहन समालोचना।
समीक्षक: प्रा. डा. प्रेमशान्ति तुलाधर।
प्रमुख अतिथि: उपन्यासकार मल्ल के. सुन्दर।
सभाध्यक्ष: डा. ज्योति तुलाधर (अध्यक्ष, कविताया लायकू)।