नेवा: म्हसीकेगु विश्वकोष दयेकीगु

ख्वप, थिंलाथ्व अस्तमि । नेवाःतय्गु साँस्कृतिक पक्षया दक्व खँ दुथ्याकाः छगू साँस्कृतिक ज्ञान कोश दयेकीगु जूगु दु ।
थज्याःगु कोश दयेकेत छु छु खँ दुथ्याकेमाली धकाः सहलह ब्याकेत नेवाःतय्दुने प्रतिष्ठित बौद्ध व्यक्तित मुनाः छगू पूर्वतयारी कार्यशाला बुधबार नगरकोटय् जुल ।

ज्याझ्वयाः उलेज्या यासें शताब्दी पुरुष सत्यमोहन जोशीं थ्व दक्व नेवाःतय्गु दुग्यंक म्हसिका बिइगु मुंकेबहगु ग्रन्थ जुइगुलिं सकसिनं बांलाक सहलह यानाः मजिमगाःगु खँ दक्व दुथ्याकाः पित बिइत इनाप यानादिल ।

ज्याझ्वःया संयोजक यज्ञमानपति वज्राचार्यं थज्याःगु ज्याय् सकसिनं ग्वहालि यायेमाःगु खँ तसें थम्हं चाःथें उकिइ दुथ्याकेमाःगु विषयया बारे कनादिल ।

थुगु कार्यशालाया परिचय बिसें नेपालभाषा एकेदमिया सदस्यसचिव मल्ल के सुन्दरं थ्व छगू अभूतपूर्व मौका जूगुलिं दक्वसियां थःथःगु क्षेत्रया ज्ञान दक्व प्वंकाः थुकियात छगू पूर्ण ग्रन्थ दयेकेमाःगु खँ कनादिल । वय्कल‌ थुगु ज्ञानकाेशया प्रारुप नं न्ह्यब्वयादिल ।

ज्याझ्वलय् ब्वतिकाःपिं सकसिनं भाषा, साहित्य, लिपि, कला, स्थापत्यकला, मूर्तिकला, बास्तुकला, नसात्वँसा, पुँसा, तिसा, नखः, चखः, पर्व, जात्रा, रिति, परम्परा, आस्था, संस्कृति, नेवाः म्हसिका, इतिहास आदि विषय् छु छुँ खँ दुथ्याकेमाली धकाः थःथःगु बिचाः तयादिल । उकिया लागि सहभागीपिन्त न्हय्गु ब्वय् ब्वथलाः पुचःपुचः सहलाहयाकूगु खः ।

नेपालभाषा एकेदमिया ग्वसालय् जूगु उगु ज्याया लागि येँ, यल ख्वपं ६०म्हति विज्ञपिं व मेमेपिं सहभागी जूगु खः।

झीगु ड्ट कमंं साभार