हलिं नेवा: दबू नेपा: देय् मू कवलं अमेरिकाया हीरा ब्यापारी समिरयात हन

यें /अमेरिकाया चिधंगु व्यवसाय याइपिनि दथुइ उत्कृष्ट १० म्ह दुने लायत ता:लानादीम्ह न्यूयोर्कया हीरा ब्यापारी समीर महर्जनयात हलिं नेवा: दबू नेपा: देय् मू कवलं थौं यें छगू ज्याझ्व: यासें हनेज्या यात ।
नेपा: देय् मू कव:या नाय:शाक्य सुरेनं स्वांमा: क्वखायेका: सम्मान यासें वयक:यात भिंतुना देछाना दीगु उगु ज्याझ्वलय् महासचिव रश्मिला प्रजापति, सचिव महर्जन रत्नं , दांभरी सुरेन्द्र भक्त श्रेष्ठ लगायत मेमेपिं दुज:पिसं खादां न्ययेका: खें सगं बिया: भिंतुना देछा:गु ख: ।

(नुग: खँ तयेगु झ्वलय् समीर महर्जन)

ज्याझ्वलय् नुग: खँ तसें हीरा बनेज्यामि लिसें हलिं नेवा: दबू अमेरिका कव:या न्वकू भाजु समीर महर्जनं थपिन्त टप टेन दुने लाकेगुलिइ नेवा: ख्य:या नं भूमिका दु धयादील । थ्व ब्याबसायिक सफलताया ल्याखं जक मखु समाजया नितिं या:गु योगदानयात नं मुल्यांकन याना: थुकथंया धलखय् थ:गु नां ला:गु खँ कनादील ।
अमेरिकाया बिजिनेस म्यागेजिन ईन्क डटकम (Inc.com) पाखें वंगु अक्टोबर २९ मंगलवार प्रकाशित या:गु अमेरिकाया झिम्ह चिधंगु व्यापार यापिं सफल ब्यापारी व ब्यवसायीतय् लिष्टय् वयक:यात “The Peak Performer” या उपमा बिसें वयक:या ब्यापारया सफलता बारे च्व:गु ख: ।
न्यूयोर्कया क्विन्स डाईमण्ड ज्वेलरी पस: मार्फत हिरा लुँ वह:या ब्यापार याना च्वनादीम्ह समीर महर्जन  यल देय् या कायमचा ख: । यलया छम्ह बुँज्यामिया काय् मचानिसें अमेरिकाया छम्ह सफल हीरा ब्यापारी तक जुइत ता:लानादीम्ह वयक: समिर महर्जनया सफलताया बाखं तसकं प्रेरणादायी जुइफु ।

महर्जनयात सुभाय् पोस्ट डट कम  ज: पाखें नं यक्व भिंतुना देछना च्वना: ।