आज विमोचित किताबबाट

वार्तामा बस्नका लागि सरकारी पक्षबाट उपप्रधानमन्त्री रामचन्द्र पाैडेल र माओवादी पक्षबाट पोलिटब्युरो सदस्य रवीन्द्र श्रेष्ठ आउने तय भयो । तर स्थिति के भने सरकारले बोलाएको ठाउँमा रवीन्द्र श्रेष्ठ नआउने र माओवादीले बोलाएको ठाउँमा रामचन्द्र पाैडेल जान नमिल्ने । यसैले स्थान व्यवस्थापन गर्ने जिम्मा समेत पद्मरत्न तुलाधरको काँधमा पर्नअायो । त्यसो भनेर त्यस्तो वार्ता उहाँको आफ्नै घरमा गर्न हुने पनि होइन । किनभने त्यसबेला उहाँको घर सेना लगायत सुरक्षाकर्मीहरूको निगरानीमा परिसकेको थियो । अरू स्थानमा गर्ने हो भने पनि अति नै विश्वसनीय स्थान व अति नै विश्वसनीय कुनै मानिसको घर चाहियो । यस्तो बेलामा उहाँले पाटन पुल्चोकस्थित आफ्ना साहित्यिक साथी नर्मदेश्वर प्रधानलाई सम्झनुभयो । नर्मदेश्वर प्रधान राजनीतिबाट पूर्णता टाढा रहेका अति नै सरल व्यक्ति । त्यसबेला उहाँ नेपालभाषा केन्द्रीय विभागका प्रमुख हुनुहुन्थ्यो । उहाँको घरमा त्यस्तो वार्ता भइरहेको छ भनी कसैले शंका गर्न सक्दैनथ्यो । उहाँले त्यही घर रोज्नुभयो ।
आज विमोचित ‘पद्मरत्न तुलाधर’ पुस्तकबाट