वर्ल्ड नेवा: अर्गनाइजेसनया न्हूम्ह नाय: संयुक्त श्रेष्ठ

हलिं नेवाः दबू (वर्ल्ड  नेवाः अर्गनाइजेशन–डब्लुएनओ) या प्यक्वःगु तःमुँज्या दबूया न्हूम्ह नायः ल्यसें क्वचाःगु दु । दबूया न्हूम्ह नायः कथं बेलायतय् च्वनादीम्ह नेवाः अभियन्ता संयुक्त श्रेष्ठ निर्वाचित जुयादीगु दु ।

दबूया प्यक्वःगु तःमुँज्या अमेरिकाया न्यूयोर्कय् वंगु शुक्रवाः न्ह्याःगु खः । स्वन्हु तक जूगु तःमुँज्याया म्हिगःया अन्तिम न्हि न्हूम्ह नायः भाजु श्रेष्ठयात निवर्तमान नायः सिजन श्रेष्ठं कार्यभार लःल्हानादिसें समापन याःगु खः ।

न्हूम्ह नायः संयुक्त श्रेष्ठ बेलायतया लण्डनय् च्वनाः थीथी नेवाः ज्याझ्वः न्ह्याका च्वनादीम्ह खः । वय्कलं बेलायतय् नेवाः मस्तय्त नेवाः भाय् स्यनेगु कक्षा न्ह्याकेगु लिसें थीथी कथंया ज्याझ्वःत न्ह्याकादीगु खः ।

डब्लुएनओपाखें थुगुसी जुइगु तःमुँज्याया लागिं न्हूकथं निर्वाचन ज्याझ्वः सञ्चालन याःगु खः । थुकिया लागिं छुं ई न्ह्यवंनिसें हे निर्वाचन सम्बन्धी ज्याखँत न्ह्याका वयाच्वंगु खः । थुकिं यानाः तःमुँज्याय् निर्वाचन सम्बन्धी ज्याखँ याये म्वायेक निर्वाचित पदाधिकारीपिंत कार्यभार हस्तान्तरण यानाः समापन याना छ्वःगु खः ।
कार्यभार हस्तान्तरण यासें निवर्त–मान नायः सिजन श्रेष्ठं न्हूगु पुस्तायात कार्यभार बी खनाः थःपिं तसकं लय्तायागु खँ कनादीगु खः ।

अथे हे न्हूम्ह उपसभापति कथं निर्वाचित समिर महर्जनं थौं न्ह्याथाय् वंसां नेवाःत आः फुइत्यंगु खः ला धकाः धायेगु यानाच्वंगु न्यने दुसां यदि झी सकलें जाल धाःसा नेवाःतय्त अझ नं न्ह्यःने यंकेगु सम्भावना दनि धयादिल । आः न्हूगु पुस्तायात नेवाः भाय् व संस्कृति बियाः न्ह्याः वनेगु लागिं यक्व ज्या याये मानि धासें वय्कलं थुकिया लागिं चिचीधंगु खँय् तक्यनाच्वने मजिउगु खँ कनादिल ।

डब्लुएनओया तःमुँज्याय् नेपालं ख्यालि जुजु मदनकृष्ण श्रेष्ठं मूपाहां कथं ब्वति कयादीगु खःसा ज्याझ्वलय् सांस्कृतिक र्‍याली, सांस्कृतिक ज्याझ्वः, अन्तक्र्रिया ज्याझ्वः व नेवाः हकहितया बारे थीथी प्रवचनया ज्याझ्वः जूगु खः ।( साभार)